Tinna Alavis
Karamellukjúklingur
11. maí 2017

Karamellukjúklingur

Ég gerði þennan kjúklingarétt um daginn en hann er bragðmikill og svolítið sætur á bragðið. Ég útbjó einnig kartöflugratín til þess að hafa með og mér fannst þetta passa vel saman.

Allt sem þarf:

3 kjúklingabringur
510 g BBQ sósa
1 dós ananassafi
4 kramin hvítlauksrif
1 msk. rifið engifer
1 dl hunang
100 g púðursykur
íslenskt smjör til steikingar

Aðferð:

Byrjið á því að skera bringurnar í passlega stóra bita. Takið næst fram stóra skál og útbúið marineringuna. Í henni er BBQ sósa, ananassafi og hvítlauksrif ásamt engiferi, hunangi og púðursykri. Hrærið þessu vel saman og setjið kjúklinginn út í. Mér finnst best að láta kjúklinginn liggja í marineringunni í 2-4 klst. (í lokuðu íláti) inni í ísskáp fyrir eldun.

Steikið kjúklinginn þar til hann byrjar að brúnast og orðinn karamelliseraður. Hellið sósunni þá yfir og leyfið þessu að malla í nokkrar mínútur til viðbótar á miðlungs hita. Berið fram með t.d. salati og kartöflugratíni.

Hérna er uppskriftin af gratíninu sem ég var með..

Allt sem þarf:

Kartöflur
250 ml rjómi
1 laukur
1 Óðals cheddar ostur

Aðferð:

1. Hitið ofninn í 180°C (undir & yfir hiti).
2. Skrælið kartöflurnar, skerið þær í sneiðar og raðið í botninn á eldföstu móti.
3. Saxið laukinn smátt og dreifið yfir kartöflurnar.
4. Setjið Cheddar ostinn í matvinnsluvél þar til hann er orðinn að kurli og stráið yfir allt.
5. Hellið rjómanum yfir.
6. Eldið kartöflugratínið í 1 klst.

Ég vona að þetta smakkist vel :)

- Tinna Alavis - 

Viltu fylgjast með þessum bloggara?

Skráðu þig til að fá nýjustu færslurnar sendar!