Tinna Alavis
Eftirréttur fyrir gamlársdag
29. desember 2015

Eftirréttur fyrir gamlársdag

Þessi eftirréttur er alltaf á boðstólnum hjá okkur á aðfangadag og einnig á gamlárskvöld.
Þetta er allra besti eftirréttur fyrr og síðar. Það skemmir heldur ekki fyrir hvað hann er ótrúlega einfaldur!

Ananasfrómas

 

Uppskrift:

1 heil dós niðursoðinn ananas og safinn eða 2 litlar frá Gestus (mér finnst ananassafinn frá þeim bestur)
5 egg
250 gr. sykur
1/2 l rjómi (þeyttur)
10 blöð matarlím

Aðferð:

Byrjið á því að þeyta egg og sykur þangað til blandan verður létt og ljós.

Þeytið því næst rjómann og blandið saman við eggja- og sykurblönduna með sleif.

Sigtið ananassafann frá bitunum og hellið út í.

Næst er komið að því að bræða matarlímið í smá ananassafa (best að bræða eitt blað í einu) og hella saman við í lokin í mjórri bunu og hræra stöðugt í á meðan. Passið að matarlímið fari ekki sjóðheitt út í, heldur vel volgt. Það má ekki vera farið að stífna.

Þið getið annað hvort hellt öllu í eina, stóra skál eða nokkrar litlar.
Ef þið viljið gera smá stemningu við matarborðið þá er tilvalið að skella einni möndlu ofan í og sá sem fær möndluna fær möndlugjöf :)

Látið stífna í kæli yfir nótt.

 

Ég vona að þetta smakkist vel :)

Viltu fylgjast með þessum bloggara?

Skráðu þig til að fá nýjustu færslurnar sendar!