Theodóra J. Sigurðard. Blöndal
Þorskhnakkar í rauðum hafrahjúp með tómat- og rjómaostasósu
27. september 2018

Þorskhnakkar í rauðum hafrahjúp með tómat- og rjómaostasósu

Einfaldur, mjög bragðgóður og fallegur fiskréttur með fáum hráefnum sem oftast eru til heima. Ef ekkert tandoori krydd laumast í skápnum er minnsta mál að nota aðeins paprikuna með t.d. nokkrum chili flögum bættum saman við. Skemmtilegt er að búa til sitt eigið rasp og nota t.d. haframjöl eins og í þessari uppskrift til að steikja fiskinn upp úr. Það má á margan hátt búa til sitt eigið rasp. Spennandi kostir eru  kókos, kornflakes, ritzkex, special k og múslí afgangar og blanda þeim saman við kryddum eftir smekk.

Þorskhnakkar í rauðum hafrahjúp með tómat-rjómaostasósu

Fyrir um 3 fullorðna

Innihald

800 g þorskhnakkar (um 6 stk.)

Rasp

3 – 4 dl haframjöl

½ tsk. salt

½ tsk. svartur pipar

2 tsk. paprika, mulin

2 tsk. tandoori, indversk kryddblanda

1 egg til að velta fisknum upp úr

Tómat- og rjómaostasósa

3 laukar

3 dl tómatsósa

½ - 1 dl vatn

100 - 125 g smjör

3 msk. rjómaostur frá Gott í matinn (eða meira eftir smekk)

Meðlæti

Soðnar og ristaðar kartöflur og salatblanda.

 

Sósa: Skerið laukinn, ýmist í sneiðar eða í litla bita. Allt eftir hentisemi. Bræðið smjörið og setjið laukinn saman við. Lækkið hitann og látið laukinn malla í smjörinu, t.d. á meðan verið er að búa til raspið. Látið laukinn mýkjast vel í smjörinu (8 - 12 mínútur). Setjið tómatsósuna og vatnið saman við lauksmjörið og hrærið. Það má alveg setja ögn af pipar saman við þessa sósu ef þannig liggur á manni. Setjið rjómaostinn saman við, látið hann bráðna í sósunni og smakkið til.

Rasp: Setjið haframjölið í blandara og myljið það rétt aðeins til þess að fá það fínmalað í bland við grófmalað. Blandið kryddi saman við.

Sláið eggið létt saman á djúpum diski.

Hitið smjör eða olíu (eða bæði) á pönnu. Veltið fiskbitunum upp úr eggi og síðan upp úr raspinu. Setjið fiskbitana á heita pönnu og steikið þá nokkrar mínútur á hvorri hlið. Lækkið hitann aðeins. Mér finnst gott að geyma bitana sem búið er að steikja í heitum ofni á meðan ég klára alla fiskbita þannig að allt helst heitt.

Eftir að kartöflurnar eru soðnar sker ég þær í tvennt, set þær í eldfast mót, stappa þær rétt aðeins með gaffli, set smjörklípu yfir, sting þeim inn í ofn og  læt þær ristast á meðan ég klára matinn.  

Berið fram með fallegu grænu salati.

Verði ykkur að góðu,

Matarást

 

Viltu fylgjast með þessum bloggara?

Skráðu þig til að fá nýjustu færslurnar sendar!