Theodóra J. Sigurðard. Blöndal
Teddulegt grænmetislasanja
14. mars 2016

Teddulegt grænmetislasanja

Er erfitt að koma grænmeti ofan í börnin? Búið til grænmetislasanja og þið sjáið grænmetið hverfa ofan í þau! Það gerist ekki betra! Grænmetislasanja eins og ég geri það! Nú jæja þá. Mögulega finnst einhver þarna úti sem gerir það mjög bragðgott líka. Þetta lasanja er vegan ef osturinn er skilinn eftir í ísskápnum.

Hver er galdurinn við að gera gott lasanja? Notið það grænmeti sem ykkur finnst fallegt og bragðgott, njótið þess sem þið eruð að gera og síðast en ekki síst - sætið sósuna ykkar með pínu af t.d. suðusúkkulaði eða döðlum.

Ég geri að sjálfsöðgu líka afbragðs lasanja með bechamél-sósu og kjöti en í þetta sinn er það grænmetislasanja. Ég bauð oft upp á það þegar ég sá um að matreiða fyrir börn og vakti það alltaf mikla lukku þegar það var borið fram get ég lofað. 

Teddulegt grænmetislasanja

2 gulir laukar, saxaður

1 búnt spergilkál, smátt saxað nema stilkar

3-6 stilkar sellerí

1 box sveppir, sneiddir

2 eggaldin, skorin í sneiðar

1/2 kúrbítur, smátt saxaður

2 sætar kartöflur, skornar í teninga

1 handfylli af söxuðum döðlum

40 g suðusúkkulaði

2 dósir af niðursoðnum söxuðum tómötum

2 dl vatn

2 grænmetiskrafts-teningar

salt, svartur pipar, chiliflögur eftir smekk

olía til steikingar

1 pakki af lasanja-blöðum

Mozzarellaostur, rifinn

Parmesan, rifinn

Salat að eigin vali

 

Aðferð:

Hitið ofninn í 180 °C.

Skerið allt grænmetið. Ég sker laukinn í sneiðar, spergilkálið mjög smátt og sleppi stilkinum en það er auðvitað val, selleríið er skorið í sneiðar eins og sveppirnir. Kúrbíturinn er skorinn smátt.

Steikið grænmetið í olíunni og á meðan er eggaldinið skorið langsum, penslað með olíu og hitað í ofninum. Kartöflurnar eru skornar í teninga (því smærri, því fljótari eru þeir að steikjast) og sett í ofninn og látnir verða mjúkir. 

 

Þegar grænmetið á pönnunni er orðið mjúkt er tómötunum hellt saman við ásamt vatni. Kryddið eftir smekk og bætið við döðlunum. Súkkulaðið er sett saman við alveg í lokin. Látið smásjóða á meðan grænmetið í ofninum er að klárast.

Svo er bara að púsla þessu saman í form. Notið ekki allar kartöflurnar, geymið til að strá yfir í lokin. Sósa fyrst, lasanjablöðum og eggaldin raðað, sósa yfir, kartöflur og svo framvegis. Stráið ost yfir og vippið inn í ofninn og bakið í 30- 40 mínútur.

Látið standa og kólna aðeins áður en þið berið matinn fram. Bjóðið upp á gott salat með matnum og rifið helling af parmesanosti yfir.

Verði ykkur að góðu!

 

Matarást,

Viltu fylgjast með þessum bloggara?

Skráðu þig til að fá nýjustu færslurnar sendar!