Theodóra J. Sigurðard. Blöndal
Sumarlegur saltfiskur
14. ágúst 2017

Sumarlegur saltfiskur

Saltfiskur á það til að verða útundan hjá mér í matreiðslu. Saltfiskur er algjört lostæti að mínu mati og verðum við að passa upp á þetta dásamlega íslenska hráefni og nota meira af því.

Ég bauð upp á þennan saltfiskrétt um daginn fyrir nokkra góða vini. Rétturinn sló í gegn enda er hann sérlega bragðgóður og skemmtilegur í matreiðslu þar sem hann er bæði litríkur og með spennandi bragði. Í honum er t.d. kapers, ólífur, lime og kóríander sem ég held mikið upp á.

Það er ekki síður skemmtilegt að dunda sér við að búa réttinn til, enda er allt hráefnið sett í pott og látið malla í nokkurn tíma, þar til hann er borinn fram.

Lostæti!

Uppskrift fyrir 4 - 6 manns

 

800 g - 1 kg saltfiskur, gott er að nota hnakkastykkin

2-3 msk. olía

4-6 kartöflur, skornar í teninga (fleiri eftir smekk)

4-5 hvítlauksrif, maukuð

1-2 rauðir chilli, fræin fjarlægð og piparinn skorinn smátt

2-3 dósir niðursoðnir tómatar

2 msk. kapers

Grænar ólífur eftir smekk

1 msk. óreganó

Skvetta af worchestershiresósu

Salt og svartur pipar eftir smekk

Söxuð steinselja

 

Meðlæti:

Saxaður kóríander

Lime skorið í mátulega stóra báta

Salatblöð að eigin vali

Avókadó, (1-2 stk.) skorið í bita

1/2 sítróna, safinn kreistur

grófar saltflögur

Gott brauð

Skerið saltfiskinn í bita og setjið til hliðar.

Skerið kartöflurnar í litla teninga (með eða án hýðis - ég vil alltaf hafa hýðið með) og laukinn í þunnar sneiðar.

Notið nokkuð djúpa pönnu (eða pott) og hitið olíuna í henni.

 

Byrjið á því að setja kartöflurnar í pönnuna og brúnið þær. Það tekur nokkrar mínútur. Bætið lauknum við og brúnið áfram.

Pressið hvítlauksrifin og blandið þeim saman við.

Chilli er skorið smátt og bætt saman við.

Hellið tómötum út í og látið örlítið af vatni saman við það sem eftir er í dósinni og bætið við.

Síðan er kapers, ólífum og óreganó bætt við. Endilega aukið skammtinn af þessu ef ykkur langar.

Látið suðuna koma upp, lækkið hitann og látið pottréttinn malla varlega áfram í 15-20 mínútur. Hrærið í honum af og til.

Smakkið til með salti og pipar.

Saxið steinselju og kóríander smátt.

Mér finnst gott að hafa koríander í sér skál á borðinu þar sem það eru ekki allir hrifnir af honum.

Hins vegar er óhætt að bæta mikið við af steinselju í réttinn.

Ef ykkur finnst rétturinn vera of þurr er allt í lagi að bæta vatni í hann.

Í lokin er saltfiskurinn settur saman við og rétturinn látinn smásjóða við vægan hita áfram þar til fiskurinn er eldaður (það tekur fiskinn u.þ.b. 10-12 mínútur að verða tilbúinn).

 

 

Leggið salatblöð fallega á disk og dreifið avókadó ofan á. Kreistið sítrónuna yfir og stráið nokkrum saltkornum yfir ásamt skvettu af ólífuolíu.

Raðið lime-bátum fallega á disk.

Berið réttinn fram með góðu brauðu.

Verði ykkur að góðu og njótið vel! 

Matarást,

Viltu fylgjast með þessum bloggara?

Skráðu þig til að fá nýjustu færslurnar sendar!