Theodóra J. Sigurðard. Blöndal
Rómantísk brúðarterta í sveitabrúðkaupi
10. júlí 2015

Rómantísk brúðarterta í sveitabrúðkaupi

 

Ég var svo heppin að vera beðin um að taka að mér að baka brúðartertu síðasta sumar og langar að deila þeirri reynslu sem ég hafði mjög gaman af.

Það er ekkert mál að baka brúðartertu - bara hlusta vel á óskir brúðarinnar og brúðgumans varðandi útlit og bragð og gera nákvæmlega það sem þau vilja!

Tertan sem hér er um ræðir var alveg í samræmi við þema brúðkaupsins - sumar, gleði, einfaldleiki og að sjálfsögðu kærleikur.

Til skreytingar á tertunni voru notuð sömu blóm og fundust í brúðarvendinum en á milli tertubotnanna var súkkulaðikrem ásamt jarðarberjum, hindberjum og bláberjum. Súkkulaðikremið bjó ég til deginum áður til að flýta fyrir. Tertubotnarnir voru hafðir ljósir (en auðvitað er ekkert mál að breyta þeim í súkkulaðibotna með því að bæta 2-4 msk af kakódufti við kökudeigið)

Útkoman var falleg, stílhrein, bragðgóð og rómantísk terta. Alveg eins og parið sjálft!

 

 

Botnar

Þessi terta dugar fyrir rúmlega 60 manns. Sem nota bene eru búnir að borða og fá sér desert - þannig að ég byrjaði á því að baka tvo skammta af kökubotnum. Ég hef prufað að þrefalda svona uppskriftir og líka að tvöfalda en mér finnst það aldrei koma jafn vel út og að bara þeyta saman einfalda uppskrift fyrir hverja og eina köku. Seinvirkt? Mögulega - en þú getur treyst því að kakan verður í lagi ;)

Í tvo kökubotna sem hægt er að skera í þrjú lög þarf:

140 g suðusúkkulaði

250 g smjör

4 egg

4 1/2  dl sykur

7 1/2 dl hveiti

2 tsk matarsódi

1 1/2 tsk lyftiduft

1/2 tsk salt

2 msk vanillusykur

5 dl ab-mjólk (eða súrmjólk, eða sýrður rjómi og mjólkurdreitill eða skyr og smá mjólk - hef reynt þetta allt og allt virkar)

 

Ofnhiti: 175 °C

Tími: 40-50 mínútur

 

Stillið hitann á ofninum á 175 °C.

Takið til tvö smelluform, smyrjið þau og stráið í þau rifnu kókósmjöli.

Bræðið súkkulaði og smjör saman.

Þeytið egg og sykur í ljósa létta froðu.

Blandið saman þurrefnunum - hveiti, matarsóda, lyftidufti, salti og vanillusykri.

Hellið því saman við eggjahræruna og sláið létt saman.

Bætið við súkkulaði/smjörbráð og blandið varlega.

Síðast er ab-mjólkinni hellt saman við og hún er einnig hrærð varlega saman við.

Þá er bara að hella deiginu í formin og baka neðarlega í ofninum í 40-50 mínútur.

Hún mun lyftast vel þannig að ekki opna ofninn of snemma. Betra er að hafa hitastigið aðeins lægra og baka kökuna pínu lengur til þess að vera viss um að baksturinn verði í lagi. 

Fylgist vel með kökunni og látið hana kólna vel áður en hún er skorin í tvennt eða þrennt.

Þriðja botninn þarf einnig að skera þannig að hann myndar ,,toppinn” á kökunni.

Hvað langar ykkur að gera? ;)

  

Súkkulaðikrem

2,8 dl sykur

6 msk hveiti

6 msk kakóduft

3-4 dl mjólk

125 g suðusúkkulaði eða annað spennandi súkkulaði

500-700 g smjör við stofuhita

 

Jæja. Kremið. Þetta er mjjög gott krem og gaman að vinna með það. 

Setjið sykur, hveiti, kakóduft og mjólk í pott og þeytið létt. Látið suðu koma upp en lækkið hitann um leið og hrærið áfram þar til komið er þykkt krem.

Takið af hitanum, setjið súkkulaðibita út í og látið þá bráðna með kreminu.

Hellið kreminu í skál, matvinnsluvél eða hrærivél.

Þeytið kremið og bætið smjöri út í, lítið í einu og þeytið þar til allt smjör hefur klárast. Mér finnst kremið verða betra því lengur sem það er þeytt - jafnvel 20 mínútur.

Síðan þarf kremið að kólna.

Þegar það hefur kólnað er það þeytt vel og lengi í annað sinn og þá verður það silkimjúkt og fallegt að sjá.

Og nóg til af því!!

Eruð þið búin að ákveða hvaða ber þið viljið nota í kökuna? Hafið þau tilbúin ásamt fallegum tertudiski eða tertustandi. 

Setjið fyrsta tertubotninn á diskinn og smyrjið hann með súkkulaðikremi. Raðið þeim berjum yst sem þið viljið að sjáist mest en munið það líka að botnarnir þurfa að liggja ofan á hver öðrum og þurfa þess vegna berin að liggja nokkuð jafnt.

Haldið svo áfram koll af kolli að raða, smyrja og skreyta. Raðið berjunum fallega þannig að þau sjáist sem mest. Skemmtið ykkur vel!

Í lokin eru blómin lögð yfir kökuna og í kringum hana til skreytingar. Púðrið kökuna með flórsykri til að fá fallega áferð á botnana. 

 

 

Gangi ykkur vel og munið umfram allt að hafa gaman af og prufið allt sem ykkur langar!

Viltu fylgjast með þessum bloggara?

Skráðu þig til að fá nýjustu færslurnar sendar!