Theodóra J. Sigurðard. Blöndal
Massaman karrí með kjúklingi
24. janúar 2018

Massaman karrí með kjúklingi

Hvað er betra á köldu vetrarkvöldi eins og núna en að elda ljúffengan, bragðmikinn karrírétt?

Massaman karrí er kjúklingaréttur frá Tailandi með kartöflum, salthnetum og lime-laufum sem hentar mjög vel bæði fyrir börn og fullorðna þar sem hann er ekki sterkur. Ef þig langar í meiri hita er um að gera að bæta við chiliflögum og já.. bara meira af öllu. Rétturinn er mjög bragðgóður og lime-laufin sem í honum eru er einmitt eitt af minum uppáhalds kryddefnum. Hægt er að fá lime-lauf í asískum verslunum og eru þau seld frosin. Það er líka hægt að nota sítrónugras ef lime-laufin finnast ekki.

Og svo er auðvitað hægt að nota nautakjöt í stað kjúklingsins og að sjálfsögðu er líka hægt að nota aðeins grænmeti í réttinn.

Massaman-karrí blandan fæst í flestum búðum og er selt sem krem (paste) í krukku.

 

Massaman karríréttur

Fyrir 4

4 kjúklingabringur

3 - 4 msk. massaman karríblanda

400 g kókosmjólk

2 gulir laukar

3 - 4 gulrætur

5 kartöflur

3 cm engifer, smátt skorið

2 msk. hnetusmjör

2 dl salthnetur

½ rauð papríka skorin í litla bita

2-3 msk. fiskisósa

2 msk. hrásykur eða pálmasykur

½  dl tamarindsósa (eða 2 msk. limesafi og 1 msk. púðursykur)

1 – 2  teningar af grænmetiskrafti eða kjúklingakrafti eftir smekk

4 limeblöð (eða eftir smekk)

35 g smjör

 

Meðlæti

Hrísgrjón, salat

 

Aðferð

Skerið engiferið smátt og gulræturnar í sneiðar. Skerið laukinn i frekar stóra bita. Afhýðið kartöflurnar og skerið þær í minni bita.

Skerið kjúklingabringurnar í bita.

Hitið smjör í potti eða pönnu.  Setjið 2 stórar matskeiðar af massaman karrípaste á pönnuna ásamt engiferinu og gulrótarbitunum. Látið hitna á pönnunni og bætið svo við laukinn og steikið saman þar til laukurinn hefur fengið á sig fallegan lit.

Setjið kjúklingabitana saman við og brúnið þá með lauknum. Það er nóg að brúna kjúklingabitana þar sem þeir eiga eftir sjóða hvort er.

Bætið kartöflum saman við og hellið kókosmjólkinni út í ásamt fiskisósunni, hrásykrinum, hnetusmjörinu, tamarindsósunni og grænmetiskraftinum. Hrærið í og lækkið hitann undir svo rétturinn nái að rétt svo malla. Bætið lime-laufunum og salthnetunum saman við og látið sjóða með réttinum. Smakkið til og bætið við meira af massaman kryddblöndu, hetusmjöri eða t.d. limelaufum ef ykkur hentar. Ég þarf alltaf að bæta meira við af öllu.

Látið malla í rúmlega 10-15 mínútur eða þar til kartöflurnar er soðnar. Í lokin eru 35 g (u.þ.b. 2 msk.) bætt út í réttinn til að fá mýkt í áferðina og gott bragð. 

Berið fram með hrísgrjónum og salati.

 

Verði ykkur að góðu,

matarást

 

Viltu fylgjast með þessum bloggara?

Skráðu þig til að fá nýjustu færslurnar sendar!