Theodóra J. Sigurðard. Blöndal
Kanilsnúðakaka eða bara smjörkaka
30. júní 2015

Kanilsnúðakaka eða bara smjörkaka

Ein af mínum uppáhaldskökum til að baka og bjóða upp á!

Deigið er meðfærilegt og skemmtilegt að vinna með og svo er guðdómlegi kanilsnúðailmurinn ekki af verri endandum. Úr þessu deigi er annað hvort hægt að gera snúða, fléttur eða þá að dunda sér við að púsla saman kanilsnúðaköku eins og þessari sem ég er að lýsa hér á eftir.

Í þetta sinn notaði ég sem fyllingu vanillukrem (sem ég gerði úr búðingadufti og mjólk) og kanilsykur en það er líka hægt að nota marsípan, pistasíumassa, rúsínur, epli og suðusúkkulaðibita. Það er bæði hægt að útbúa sitt eigið vanillukrem eða þá fara styttri leiðina og nota t.d. Royalbúðing eða vanillubúðinginn frá Dr. Oetker sem fyllingu. Ég nota þá aðeins minna magn af mjólkinni til þess að fá gott og stíft krem að nota í kökuna. Ég vil líka hafa mikið af því.

Þessi uppskrift dugar í eina kanilsnúðaköku og mögulega 16-20 litla snúða.  Ég mæli eindregið með því að gera tvöfalda uppskrift og setja snúða í frystinn til að eiga. Þeir eiga það til að hverfa hratt þessar elskur ;)

Kanilsnúðar grunnuppskrift

40 snúðar eða 1 snúðakaka og 16-20 snúðar

 

100 g smjör brætt

5 dl mjólk

1 1/2 dl sykur

1 msk kardemommuduft (eða eftir smekk)

2 tsk þurrger

1 tsk salt

10-14 dl hveiti

 

Fylling I

vanillukrem - úr búðingsdufti eða gerðu þitt eigið!

 

Fylling II í snúða

kanilsykur

smjör við stofuhita

 

Pensl:

1 egg eða mjólk

perlusykur

 

Ofnhiti: 180 °C fyrir snúðakökuna

              200 °C fyrir snúða

 

Tími: Snúðar: 8-12 mínútur

         Snúðakaka: 16-20 mínútur

 

Aðferð:

Byrjið á því að bræða smjörið. Takið það af hitanum og hellið mjólkinni saman við. Setjið pottinn aðeins aftur á hitann og látið hitna smá til viðbótar. Hitastigið á að vera þannig að þú getur stungið litla fingur ofan í og ekki brennt þig. Vökvinn á að vera volgur eða um 37 °C.

Blandið þurrrefnunum saman í skál en notið aðeins um helminginn af hveitinu til að byrja með.

Hellið vökvanum saman við hveitiblöndunina og hrærið. Bætið meiri af hveiti í eftir þörfum og hnoðið í gott deig. Deigið má alveg vera aðeins klístrað - það á að vera létt í sér og veltast vel um í skálinni. Látið það hefast við hita t.d. nálægt ofninum og eldavélinni þar til það hefur tvöfaldast. Það gæti tekið 45-60 mínútur. Til að flýta fyrir er hægt að setja skálina í heitt vatn. Þá mun deigið hefast fyrr.

Núna er upplagt að taka fram smelluform og setja í það bökunarpappír. Setjið jafnframt bökunarpappír á ofnplötu. Ef þið eigið múffuform er hægt að nota þau undir snúðana en það er alls ekki nauðsynlegt að nota þau.

Búið til vanillukremið.

Blandið saman kanil og sykur og hafið smjörið tilbúið.

 

Þegar deigið er tilbúið er því hvolft úr skálinni á hveitistráða borðplötuna og hnoðað örlítið þar. Skerið það í 4-5 jafna hluta. Byrjið á því að gera botninn fyrir smjörkökuna.

Fletjið deigið út í ferhyrning með kökukeflinu. Það á kannski að vera 0,5-1 cm á þykkt - alls ekki þykkara. Setjið deigið í botninn á forminu og látið það ná örlítið upp á kantana á því.

Setjið vanillukremið á deigið sem er í botninum á forminu og dreifið úr því.

Takið næsta deighluta og fletjið hann út í langan ferhyrning - kannski u.þ.b. 20 cm x 30 cm eða stærri. Munið að hafa deigið ekki of þykkt.

Smyrjið deigið með smjöri og stráið kanilsykri yfir. 

Rúllið deiginu varlega saman. Skerið í snúða sem eru u.þ.b. 2 cm á þykkt og raðið þeim jafnóðum í formið. Byrjið á einum í miðjunni og svo koll af kolli. Hafið dágott pláss á milli hvers snúðs því þeir eiga eftir að hefast og stækka um helming.

 

Búið til snúða úr afganginum af deiginu, setjið þá í pappírsform eða leggið beint á bökunarpappírinn. Látið hefast á hlýjum stað þar til þeir hafa tvöfaldast.

Þegar snúðakakan og snúðarnir hafa tvöfaldast þarf að pensla með eggi áður en þeir bakast. Sláið einu eggi létt saman með gaffli og penslið létt yfir alla snúðana. Þetta er gert til þess að fá meiri glans á bakstrinum en einnig til að perlusykurinn festist á. Stráið perlusykri yfir og bakið neðarlega í ofninum. 

Gangi ykkur vel og verði ykkur að góðu!

Matarást,

 

 

Viltu fylgjast með þessum bloggara?

Skráðu þig til að fá nýjustu færslurnar sendar!