Theodóra J. Sigurðard. Blöndal
Indverskur Butterchicken frá Teddu
05. nóvember 2015

Indverskur Butterchicken frá Teddu

Butterchicken eða Murg Makhani (nú eða smjörkjúklingur á íslensku) nefnist þessi guðdómlegi, yndislegi og vinsæli indverski kjúklingaréttur. Hann er mjög vinsæll á mínu heimili, en þegar ég eldaði mat fyrir börn í leikskóla bauð ég reglulega upp á þennan rétt og var hann mjög vinsæll þar líka. Það er því óhætt að mæla með honum bæði fyrir börn og fullorðna.

Uppskriftir af Butterchicken eru allar svipaðar í grunninum – þær innihalda m.a. engifer, chili, kanil og kardemommu. Uppskriftir geta fyrir suma virst flóknar þar sem kryddin eru mörg en ég lofa – þetta er vel þess virði og mjög skemmtilegt að elda þennan ljúffenga rétt.

Ég mæli með því (ef tími er nægur og búið er að plana matinn degi áður) að láta kjúklingabringurnar liggja í marineringu (ab-mjólk, sítrónusafi, papríkukrydd, tandoorikrydd, kanill, kúmen, salt, pipar, hvítlauk, rifið engifer) í sólarhring ef þið hafið tíma. Það gerir bringurnar mjög safaríkar og gómsætar.

Ég kýs að bjóða upp á soðið bygg sem meðlæti ásamt indverskri Raitu-sósu. Ef ég hef tíma baka ég Naan-brauð – en þau fást líka tilbúin úti í búð til að hita upp. 

  

Butterchicken-ið hennar Teddu

Fyrir 4

4-6 kjúklingabringur, gott að skera í bita

Olía og smjör til steikingar

1 gulur laukur, smátt skorinn

4-6  hvítlauksrif, kramin

Stór biti engifer (6-8 cm) skorinn i bita

1-2 msk. papríka mulin

Svartur pipar, grófur og salt eftir smekk

1-2 tsk. kúmenfræ

4 stk. kardemommukjarnar eða 1 msk. mulið kardemommuduft

1 msk. grænmetiskraftur eða 2 teningar

1 st. kanilstöng

½ tsk. negull, mulin eða 5 – 8 st. negulnaglar

½ tsk. chiliflögur (jafnvel minna)

Tandoorikrydd  (ég nota Tandoorikrydd frá Pottagöldrum) alveg hálfa krukku (eða meira)

Skvetta af Worchestershiresósu

1 dós niðursoðnir tómatar

1 lítil dós tómatpurra

100 g smjör

 

Aðferð:

Takið til öll krydd sem þið ætlið að nota. Látið ekki stöðva ykkur þótt vanti eitthvað krydd. Prófið ykkur áfram með eitthvað annað og verið óhrædd :)

Gott er að byrja á því að steikja bringurnar upp úr olíu og smjöri. Kryddið þær með salti, pipar og paprikudufti.

Á meðan bringurnar steikjast er laukur og hvítlaukur skorinn. Afhýðið og skerið engiferið í leiðinni. Það er gott að hafa engiferið í stærri kantinum (og mikið af því).

Þegar bringurnar eru tilbúnar setjið þið þær til hliðar. Á pönnunni ætti núna að vera komið gott soð frá bringunum. Hellið því í skál og geymið.

Steikið lauk, hvítlauk og engifer upp úr olíu og smjöri. Bætið við kúmen-fræjum, lækkið hitann og látið laukinn svitna vel.

Bætið við kardemommukjörnum (sem búið er að kremja með hnífsskafti) eða muldu kardemommudufti, grænmetiskrafti og kanilstöng. Finnið ljúfan ilminn!!

Negull, chiliflögur og tandoorikrydd eru næst á dagskrá – bætið þessum kryddum saman við og hellið svo dós af niðursoðnum tómötum og tómatpúrrunni saman við. Skvettið örlítið af Worchestershire-sósu yfir, bætið soðinu af kjúklingabringunum saman við, hrærið og látið smásjóða.

Setjið kjúklingabringurnar út í og síðast bætið þið smjörstykkinu saman við. Lokið fer á pönnuna og látið malla við vægan hita í 20-30 mínútur eða lengur. Því lengur sem rétturinn fær að malla því meira bragð kemur af honum.

Raita

1 dós grísk jógurt eða hrein jógurt.

½ gúrka, rifin og safinn kreistur vel úr henni í eldhússtykki.

½ rif hvítlaukur smátt saxað eða pressað

Öllu blandað saman og látið standa aðeins og draga í sig brögðin áður en borið er fram.

 

Bygg er soðið samkvæmt leiðbeiningum.

Berið fram Butterchicken-ið ykkar með helling af smátt söxuðu kóríander, Raita-sósu og byggi!

Verði ykkur að góðu!

Matarást, Tedda

 

Viltu fylgjast með þessum bloggara?

Skráðu þig til að fá nýjustu færslurnar sendar!