Hvítlauksbrauð með rjómaosti og tómötum | gottimatinn.is
Theodóra J. Sigurðard. Blöndal
Hvítlauksbrauð með rjómaosti og tómötum
05. febrúar 2018

Hvítlauksbrauð með rjómaosti og tómötum

Það er alltaf gaman að bjóða upp á spennandi veitingar þegar við fáum gesti.  Hér er uppskrift að gómsætu hvítlauksbrauði þar sem rjómaostur er blandaður saman við vökvann í brauðinu og gerir það þar af leiðandi dúnamjúkt og bragðgott. Í brauðinu leynast líka kokteiltómatar og vil ég endilega benda á að það passar mjög vel að nota ólífur (svartar eða grænar) í brauðið og þá er þeim bætt út í með þurrefnunum. Brauðið geymist vel í 3-4 daga en einnig geymist það vel í frysti. 

 

Hvítlauksbrauð með rjómaosti og tómötum

4 tsk. þurrger

2 tsk. salt

1 msk. sykur

1 box kirsuberjatómatar

5 dl volgt vatn um 38-40 °C

2 – 4 msk. ólífuolía

100 g rjómaostur frá Gott í matinn

11 - 12 dl hveiti

Smátt söxuð steinselja, má vera þurrkuð eða fersk

 

Brauðsósa

3 hvítlauksrif, pressuð

2 msk. smátt söxuð steinselja

2-3 msk. ólífuolía

Flögusalt

Ofnhiti: 200 °C

Tími í ofni: 24 – 28 mínútur

 

Mælið um helming af hveitinu og hellið í skál. Bætið þurrgeri, salt, sykur (og steinselju ef þið viljið nota hana) saman við hveitið. Skerið tómata í helminga og blandið þeim saman við. Í annarri skál er vatni, ólífuolíu og rjómaosti blandað saman. Osturinn verður pínu kekkjóttur en það lagast um leið og þessi blanda fer saman við hveitið.

Hellið vatni – og ostablöndunni saman við hveitið og hrærið . Bætið við hveiti eftir þörfum og hnoðið þar til deigið er orðið þétt í sér og þægilegt að koma við og ekkert klístrað. Það á að sleppa vel frá hliðum skálarinnar.

Látið deigið hefast í 30-40 mínútur þar til tvöfalt á stærð á hlýjum stað undir klút. Hvolfið úr skálinni á hveitistráð borð og hnoðið deigið eftir hefinguna. Takið til form – ferkantað form í stærð um 32 x 22 cm er mjög hentugt og hellið ólívuolíu í það. Mótið kringlóttar bollur (10-12 st.) úr deiginu og raðið þeim í formið. Hafið smá pláss á milli hverja bollu þar sem þær eiga eftir að hefast enn einu sinni.

Blandið hráefnin fyrir brauðsósuna saman í skál.

Þrýstið varlega ofan á hverja bollu svo myndast lítil hola og setjið um eina tsk. af sósu í hverja bollu, dreifið sósunni örlítið yfir bolluna. Dreifið afganginum af sósunni yfir allar bollur ásamt skvettu af ólífuolíu og nokkrum saltflögum. Núna eiga bollurnar að hefast í annað sinn og eiga þær að hefast í rúmlega 30 mínútur... Já,  ég veit… þetta tekur sinn tíma en er vel þess virði.

Bakið brauðið neðarlega í ofninum í 25 – 30 mínútur. Ef bollurnar eru byrjaðar að dökkna í lok bökunartímans mæli ég með því að tylla álpappír ofan á brauðið og klára baksturinn.

Berið brauðið fram með pastaréttum, kjúklingasalati eða með nokkrum sósum og áleggi eins og þessar hér sem dæmi.

 

Feta ídýfa

2 dl grísk jógúrt frá Gott í matinn

1 msk. chilisósa

3-5 msk. fetakubbur frá Gott í matinn (eða meira eftir smekk)

Svartur pipar, eftir smekk

Basilblöð, smátt skorin eftir smekk

 

Jalapeno ídýfa

2 dl sýrður rjómi 18 % frá Gott í matinn

1 msk. majónes

4-5 jalapeno bitar, eða eftir smekk (smátt skornir)

Steinselja, smátt skorin

 

Blandið hráefnunum fyrir sósurnar saman í sitt hvorri skálinni Smakkið til. Geymið í kæli þar til borið er fram.

Verði ykkur að góðu!

 

Matarást,

Viltu fylgjast með þessum bloggara?

Skráðu þig til að fá nýjustu færslurnar sendar!