Theodóra J. Sigurðard. Blöndal
Hveitlaus pistasíukaka með hindberjum
05. maí 2017

Hveitlaus pistasíukaka með hindberjum

Sumarið er komið. Eða allavega á leiðinni, skulum við vona.

Á sumrin koma berin – t.d. jarðarber og hindber – berin eru falleg, sumarleg og bragðgóð bæði sem skreytingar ofan á tertur en eru líka dásamleg í ýmsa deserta og í kökur.

Ég rakst á  falleg hindber í búðinni um daginn og datt þá þessi tertu í hug – hún er sumarleg á að líta og nokkuð einföld í framkvæmd.

Þessi terta er ekki mjög sæt (sem höfðar til marga) og  inniheldur hún heldur ekkert hveiti og eru það pistasíuhnetur og marsípan sem fá að njóta sín í staðinn og gefur um leið kökubotninum fallegan grænan blæ.

Ég mæli með því að útbúa kremið fyrst, jafnvel kvöldið áður en kakan er búin til þar sem það þarf tíma til að þykkna. 

 

Hvítt súkkulaðiskyrkrem

100 g hvítt súkkulaði

1 ½ dl rjómi

100 g Skyr.is með vanillubragði

 

Hellið rjóma í pott og látið suðuna koma upp. Bætið súkkulaði saman við og látið það bráðna í rjómanum. Slökkvið á hitanum og hrærið í.

Látið kólna í u.þ.b. klukkutíma.

Hrærið skyri saman við og setjið kremið í ísskáp og kælið í u.þ.b. 3 tíma.

Þeytið kremið (með rafmagnsþeytara) áður en það er smurt á kökubotninn.

Við það þykknar kremið mikið.

 

Kökubotn

175 g marsípan

150 g smjör, mjúkt

150 g sykur

¼ tsk. salt

3 egg

80 g pistasíuhnetur

 

Skraut á tertu

250 g fersk hindber

nokkrar gróft saxaðar pistasíuhnetur

 

  

 

Ofnhiti 175 °C

 

Rífið marsípanið gróft og setjið í skál.

Þeytið það með smjöri, sykri og salti þar til allt hefur blandast vel.

Bætið eggjum við, einu í einu og þeytið vel á milli.

Hakkið hneturnar í gróflegt mjöl og blandið þeim saman við.

Setjið deigið í kringlótt smelluform og bakið í 30-35 mínútur.

Kælið kökuna vel.

 

Smyrjið kremið fallega yfir kökuna og raðið hindberunum fallega ofan á kremið.

Saxið nokkrar pistasíuhnetur gróflega og dreifið þeim yfir kökuna. 

 

Verði ykkur að góðu!

Matarást,

 

Viltu fylgjast með þessum bloggara?

Skráðu þig til að fá nýjustu færslurnar sendar!