Theodóra J. Sigurðard. Blöndal
Hafrakökur með bönunum
07. mars 2019

Hafrakökur með bönunum

Svakalega góðar, einfaldar og fljótlegar (nema hvað) bananahafrakökur. Hægt er að bragðbæta kökurnar með suðusúkkulaði, döðlum eða t.d. graskersfræjum og gojiberjum. Þessar kökur fara krakkar létt með að baka. Það er stórsniðugt að nota þreytta, brúna banana í kökurnar og ekkert mál er að tvöfalda þessa uppskrift.

Brjálæðislega góðar bananahafrakökur

25-30 kökur, fer eftir stærð

 

85 g smjör við stofuhita (mjög mjúkt)

1 dl púðursykur

1 dl sykur

1 egg

½ banani

1 tsk. vanilludropar

2 ½ dl hveiti

3 – 3 ½  dl haframjöl

½ tsk. matarsódi

Salt á hnífsoddi

Ég mæli mikið með því að skera suðusúkkulaði smátt og bæta við deigið. Þá nota ég um 50-75 g

 

Stillið ofnhitann á 180 °C.

Þeytið smjör og sykur vel saman í létta blöndu. Bætið egginu við og þeytið þar til það hefur blandast vel saman við. Stappið bananann og bætið honum við ásamt vanilludropum. Hrærið saman.

Blandið hveiti, haframjöli, matarsóda og salti í skál og hellið því saman við deigið og hrærið vel saman. Ef ykkur finnst deigið vera of lint þá er ekkert mál að bæta við aðeins af haframjöli eða hveiti.  Setjið bökunarpappír á bökunarplötu. Það er fínt að setja um matskeið af deigi fyrir hverja köku með smá bili á milli á plötuna. Kökurnar stækka þónokkuð. Bakið kökurnar neðarlega í 6 – 10 mínútur eða þar til þær eru rétt aðeins byrjaðar að brúnast.

Látið þær kólna aðeins áður en þær eru bornar fram með t.d. ískaldri mjólk.

 

Njótið vel!

Viltu fylgjast með þessum bloggara?

Skráðu þig til að fá nýjustu færslurnar sendar!