Theodóra J. Sigurðard. Blöndal
Gratinerað kjúklingapasta
09. september 2016

Gratinerað kjúklingapasta

Fljótlegur og gómsætur pastaréttur með kjúklingi, beikoni, sólþurrkuðum tómötum, mozzarella, rjómaosti og parmesanosti.

Rétturinn samanstendur af pasta, heimagerðri tómatsósu, kjúklinga- og beikonsósu ásamt osti. 

Tómatsósa

400 g saxaðir tómatar

1 gulur laukur, smátt skorinn

1 hvítlauksrif

Ferskt basil eftir smekk

Ólífuolía

Salt eftir smekk og ef þið viljið örlítið af sykri

500 g pasta (penne eða skrúfur)

 

Kjúklinga- og beikonsósa

500 g kjúklingur, steiktur og smátt skorinn

100 g beikon smátt skorið

1 gulur laukur, smátt skorinn

1 hvítlauksrif

Sólþurrkaðir tómatar, 1 lítil krukka smátt skornir

Steinselja, 1 poki, smátt skorin

Grænmetiskraftur 1-2 teningar

1 egg

1 dl brauðmylsna

250 g mozzarella, smátt skorinn

200 g rjómaostur

Salt, svartur pipar og þurrkaðar chiliflögur eftir smekk

Rifinn parmesanostur eftir smekk

 

Aðferð

Ofnhiti 200°C

Hitið ofninn.

Setjið vatn í pott og sjóðið pastað „al dente“ samkvæmt leiðbeiningum.

Byrjið á tómatsósunni. Hitið olíuna og steikið laukinn og hvítlaukinn þar til hann er orðinn mjúkur. Bætið tómat, basil og salt saman við. Lækkið hitann og bætið sykri við. Fjarlægið af hitanum og setjið til hliðar.

Skerið beikonið smátt og steikið á pönnu.

Á meðan skerið þið lauk, kjúkling og steinselju smátt og bætið því saman við beikonið.

Hellið sólþurrkuðu tómötunum út í.

Lækkið hitann og látið steikjast í nokkrar mínútur.

Sláið egginu saman með gaffli og hrærið því saman við ásamt brauðmylsnu.

Smakkið til með grænmetisteningi, salt og pipar.

Skerið mozzarellakúluna í tvennt og látið renna af henni. Skerið kúluna í bita.

Smyrjið ofnfast mót með olíu. Hellið um helmingi af pastanu í formið, næst er kjúklingasósan lögð yfir og tómatsósunni hellt yfir. Mozzarella-molum er stráð yfir sósunni ásamt rjómaostinum sem er lagður hér og þar með skeið. Stráið rifnum parmesanosti yfir.

 Setjið afganginum af pastanu ofan á og bætið (ef þið viljið) meira af rifnum parmesan og jafnvel rifnum gratínosti yfir.

Gott er að setja álpappír yfir réttinn á meðan hann bakast en fjarlægja hann svo í lokin.

Bakið í ofninum í um 20 mínútur. 

Stráið afganginum af steinseljunni yfir áður en rétturinn er borinn fram.

Það er frábært að bera fram gott salat með þessum rétti.

T.d. klettasalat, tómata, saxaðar döðlur og mangó. 

Verði ykkur að góðu!

Matarást,

Viltu fylgjast með þessum bloggara?

Skráðu þig til að fá nýjustu færslurnar sendar!