Theodóra J. Sigurðard. Blöndal
Fljúgandi Jakob - Kjúklingaréttur með chili rjómasósu, bönunum og beikoni
30. janúar 2019

Fljúgandi Jakob - Kjúklingaréttur með chili rjómasósu, bönunum og beikoni

Klassískur réttur sem stendur alltaf fyrir sínu. Bý þennan til allt of sjaldan eins og hann er gómsætur, einfaldur og fljótlegur!

Rétturinn á uppruna sinn að rekja til ársins 1976, en sagt er að maður að nafni Jakob hafi sett hann saman. Jakob vann við flug og þaðan er nafnið komið. Það er svo sannarlega tilvalið að búa til þennan rétt ef von er á mörgum í mat og hér er mín útfærsla á réttinum. Ég blanda chilisósu, tómatsósu og bbq-sósu saman við matreiðslurjómann en einnig er hægt að nota hreina chilli tómatsósu frá Heinz.  Mér finnst líka gott að strá smátt skornu spergilkáli yfir réttinn í lokin. Auðvelt er að breyta réttinum í grænmetisrétt með því að nota t.d. halloumi ostasneiðar í staðinn fyrir kjúkling.

Fljúgandi Jakob

(fyrir 3-4)

4 kjúklingabringur (eða einn tilbúinn grillaður kjúklingur)

4 dl matreiðslurjómi frá Gott í matinn

2 dl chili tómatsósa

2 - 3 msk. bbq sósa

2 - 3 msk. tómatsósa

4 bananar

150 g smátt skorið beikon (notið gjarnan tilbúið í teningum, steikt)

2 dl rifinn mozzarellaostur frá Gott í matinn (eða magn eftir smekk)

Salthnetur eftir smekk

Salt, svartur pipar og óreganó eftir smekk

1-2 kvistar spergilkál, aðeins blómin notuð

 

Ofnhiti 180 °C

Stillið ofnhitann.

Skerið kjúklingabringurnar í 2-3 bita. Brúnið bringurnar á pönnu og kryddið með óreganó, salti og pipar.  Setjið þær í ofnfast mót.

Hrærið saman matreiðslurjóma, chilisósu, bbq-sósu og tómatsósu (eða aðeins chili tómatsósuna ef hún er notuð). Hellið rjómasósunni yfir kjúklinginn. Skerið banana langsum og svo í tvennt. Leggið þá ofan á kjúklinginn. Skerið beikonið smátt og brúnið það (eða notið tilbúið, skorið og steikt). Dreifið beikonbitunum yfir réttinn og kryddið jafnvel með aðeins meira af pipar og óreganó (eða eftir smekk).

Bakið réttinn í um 10 mínútur. Takið hann þá úr ofninum og stráið rifnum mozzarellaosti yfir. Bakið réttinn í um 10 mínútur til viðbótar. Skerið spergilkálið örsmátt. Áður en rétturinn er borin fram er salthnetum og spergilkáli stráð yfir.

Berið fram t.d. með hrísgrjónum og grænni salatblöndu.

Verði ykkur að góðu!

Matarást,

Viltu fylgjast með þessum bloggara?

Skráðu þig til að fá nýjustu færslurnar sendar!