Theodóra J. Sigurðard. Blöndal
Fallegt bollubrauð
13. apríl 2016

Fallegt bollubrauð

Fallega skreytt bollubrauð með sesamfræjum, svörtum og gylltum, ásamt frönskum þurrkuðum jurtum. Dettur þér eitthvað fleira í hug til að skreyta og bragðbæta með?

Upplagt í klúbbinn, veisluna, með súpunni eða bara fyrir þig til að njóta með „brönsinum“ heima á sunnudögum.

Það er auðvitað ekkert mál að nota aðra hveititegund til móts við hveitið í uppskriftinni eins og t.d. spelt eða heilhveiti. Eða af hverju ekki að rífa eitthvað af gulrótum og bæta við deigið og mögulega skutla nokkrum fræjum með?

Hér er uppskrift af grunndeiginu. Svo er bara að leika sér. Góða skemmtun.

 

Grundeig bollubrauð

8-9 1/2 dl hveiti

2 msk sykur

1/2 tsk salt

2 1/2 tsk þurrger

3 1/2 dl vatn

1/2 dl olía

Fræ til skreytingar: Svört sesamfræ, gyllt sesamfræ, „herbs de provence“-krydd.

Ofnhiti: 180 °C

Mældu þurrefnin og blandaðu þeim saman í skál.  

Blandaðu volgu vatninu saman við olíuna, helltu því saman við hveitið og hrærðu í deig. Bættu hveiti við eftir þörfum og hnoðaðu þar til deigið sleppir auðveldlega frá hliðum skálarinnar.

Láttu deigið hefast á hlýjum stað þar til það hefur tvöfaldast.

Settu fræin sem þú ætlar að nota í skálar.

Hafðu form (smelluform eða annað mátulegt form sem rúmar 20-24 bollur) tilbúið til að raða bollunum í og settu í það bökunarpappír.

Taktu deigið úr skálinni og hnoðaðu það varlega með hveiti eftir þörfum.

Rúlluðu deigið í eina lengju og skerðu það í bita (þetta verða um 20-24 bollur).

Taktu einn bita, rúllaðu í kúlu og dýfðu í eina tegund af fræ eða kryddi. Raðaðu fyrstu bolluna í miðju formsins.

Taktu næsta bita, rúllaðu í bollu og dýfðu í aðra tegund af fræi (eða kryddi). Settu þessa bollu og þær næstu í hring í kringum bolluna í miðjunni með mismunandi fræjum (eða kryddi) ofan á. Haltu þessu áfram þar til formið er orðið fullt af fallegum bollum. 

Láttu brauðið hefast þar til tvöfalt.

Bakaðu brauðið neðarlega  í um 30 mínútur.

Er þetta ekki fallegt?

 

Matarást,

 

Viltu fylgjast með þessum bloggara?

Skráðu þig til að fá nýjustu færslurnar sendar!