Theodóra J. Sigurðard. Blöndal
Brownie með bökuðu rjómaostakremi
15. maí 2019

Brownie með bökuðu rjómaostakremi

Frábær brownie með bökuðu rjómaostakremi

Tvær kökur í einni, súkkulaði og rjómaostur – það getur ekki verið annað en fullkomið. Þessi kaka er mjög vinsæl að bjóða upp á við hvaða tilefni sem er hvort sem það er með sunnudagskaffinu eða í saumaklúbbnum. Kakan þarf aðeins að kólna eftir að hún er bökuð og ef ekki á að bera kökuna fram strax er upplagt að frysta hana. Hún smakkast alltaf jafn vel. Þessi uppskrift dugar í tvö minni springform eða í eitt minni skúffukökuform. Njótið vel.

Browniebotn

200 g suðusúkkulaði

200 g smjör

4 ½  dl flórsykur

3 egg

2 dl hveiti

Salt á hnífsoddi

1 tsk. vanillusykur

 

Rjómaostakrem

400 g rjómaostur frá Gott í matinn

2 dl flórsykur

2 egg

2 tsk. vanillusykur

 

Ofnhiti: 180 °C

Bræðið smjör og setjið suðusúkkulaði saman við. Látið bráðna saman og setjið pottinn til hliðar.

Þeytið flórsykur og egg saman í hvíta froðu (7-10 mín). Hellið súkkulaðismjörinu saman við eggjaþeytinginn og blandið. Bætið að lokum hveiti, salti og vanillusykri saman við og hrærið. Geymið.

Þeytið rjómaostinn með flórsykri, eggi og vanillusykri. Þeytið þar til allt hefur blandast vel saman og er orðið kremkennt.

Takið til form (gott er að nota bökunarpappír í formið svo kakan náist auðveldlega úr forminu).

Hellið til að byrja með súkkulaðideiginu í formið. Skiljið aðeins eftir af deiginu því það er notað ofan á rjómaostakremið. Hellið svo rjómaostakreminu yfir súkkulaðikökudeigið. Og síðast er afganginum af súkkulaðikökudeiginu hellt yfir. Auðvitað er líka hægt að hella minna eða meira af hverju deigi eins og manni sýnist. Notið t.d. gaffal til að „draga“ í deigið og gera mynstur.

Bakið kökuna neðarlega í ofninum í um 20-25 mínútur. það er í góðu lagi ef hún er smá óbökuð í miðjunni.  Látið kökuna kólna vel áður en hún er borin fram. Það er gott að geyma þessa köku í frysti.

Berið kökuna gjarnan fram með ferskum berum og þeyttum rjóma.

Matarást,

 

Viltu fylgjast með þessum bloggara?

Skráðu þig til að fá nýjustu færslurnar sendar!