Thelma Þorbergsdóttir
Valentínusardagurinn 14.febrúar
04. febrúar 2013

Valentínusardagurinn 14.febrúar









Dagur elskenda er á næsta leiti, 14. febrúar, eða Valentínusardagurinn eins og hann er kallaður. Valentínusardagurinn er amerískur siður en við Íslendingar höfum verið að taka upp þá hefð að fagna honum, okkur konunum til mikillar ánægju, þar sem konudagurinn er svo rétt á eftir og því má segja að febrúarmánuður sé algjör dekurmánuður okkar kvenna. Allavega er ég alsæl með þetta fyrir komulag og þetta gefur okkur enn eina ástæðuna til þess að gera eitthvað “sérstakt” saman og brjóta upp vikuna. Ekki veitir af í þessu skammdegi sem við búum við hér á landi sem mér finnst búið að hafa óvenjulega mikil áhrif á mig í þessum dimma janúarmánuði!


 

 Mér finnst þó þessi dagur ekki aðeins fyrir elskendur heldur horfi ég á þetta sem dag til þess að njóta sín með einhverjum sem manni þykir vænt um, eins og góðum vin, foreldri eða ættingja. 

 

Hér ætla ég að deila með ykkur hvítsúkkulaði bollakökum með súkkulaðifyllingu og jarðarberjarjóma. Þetta er uppskrift sem allir ættu að geta gert en hún tekur þó smá tíma að gera. Þær slóu algjörlega í gegn heima hjá mér og sérstaklega ferski jarðarberjarjóminn ofan á og óvænta súkkulaðikremið innan í kökunni smiley

 

Fyrir þá sem eru ekki hrifnir af bollum á bolludaginn þá mæli ég með þessum í þeirra stað!!

 

Tips: gott er að vera með lítinn aðstoðarmann við þennan bakstur!




 

Hvítsúkkulaði bollakökur

Byrjið á að lesa alla uppskriftina áður en þið byrjið, það er alltaf góð regla!

Stillið ofninn á 180 gráður og raðið 24 bollakökuformum á bökunarplötu

24 stk. litlar bollakökur (duni bollakökuformin)

 

110 gr. smjör við stofuhita

170 gr. sykur

2 egg

210 gr. hveiti

1 tsk. lyftiduft

130 ml. mjólk

100 gr. bráðið hvítt súkkulaði

1 tsk. vanilludropar

 

  1. Hrærið sykur og smjör vel saman þangað til blandan er orðin ljós og létt.
  2. Bætið saman við eggjum, einu í einu  og hrærið vel á milli. Hrærið í rúmar 2 mín. eftir hvert egg.
  3. Bræddu hvíta súkkulaðið yfir vatnsbaði og bættu saman við.
  4. Blandaðu saman hveiti og lyftidufti og bættu saman við ásamt mjólkinni, smá og smá í einu og hrærið vel á milli. Bætið því næst vanilludropum saman við.
  5. Setjið deigið í formin og passið að fylla þau ekki meira en 2/3. Bakið í 18 -20 mín.
  6. Takið út og kælið alveg.

 

Súkkulaðifylling

2 eggjarauður

60 gr. flórsykur

100 gr. dökkt súkkulaði

30 gr. smjör

½ tsk vanilludropar

 

  1. Hrærið eggjarauður og flórsykur saman þangað til blandan verður orðin ljós og létt.
  2. Bræðið súkkulaðið og smjörið saman og blandið saman við, hrærið þangað til súkkulaðið hefur blandast vel saman við.
  3. Bætið við vanilludropum.

 

Súkkulaðifyllingin á að vera í þykkara lagi svo hægt sé að sprauta henni auðveldlega ofan í bollakökurnar. Hægt er að þykkja súkkulaðifyllinguna með því að bæta saman við flórsykri en þá þarf oft að setja örlítið kakó á móti, best er að smakka kremið áður en það er gert. Stundum er líka nóg að láta súkkulaðifyllinguna standa aðeins og þá þykknar hún.

 

Þegar bollakökurnar hafa verið kældar vel þá þarf að taka innan úr þeim, gott er að nota stóran sprautustút til þess að þrýsta ofan í bollakökuna og snúa honum þá ertu búin að taka nægilega mikið innan úr hverri köku. Þó er hægt að nota hvaða aðferð sem hentar hverjum og einum. Geymið það sem þið takið úr því ég loka svo gatinu með því þegar búið er að sprauta súkkulaðifyllingunni ofan í.

Setjið súkkulaðifyllinguna í sprautu eða sprautupoka og fyllið hverja bollaköku fyrir sig, lokið svo fyrir.

 

Sjá aðferð hér að neðan.


Jarðarberjarjómi

½  lítri rjómi þeyttur

4 msk. flórsykur

1 tsk. vanilludropar

6-7 msk. maukuð jarðarber (5-6 jarðarber)

Best er að þeyta rjómann þar til hann er næstum því alveg tilbúinn, þá bætið við flórsykrinum. Því næst bæti þið maukuðu jarðarberjunum og vanilludropunum saman við með sleif, hrærið þangað til jarðarberin hafa blandast vel saman og rjóminn hefur fengið fallega bleikan lit.

 

Setjið u.þ.b 1 msk af jarðarberjarjóma á hverja köku. Flott er að skreyta með jarðarberjum, heilum dýfðum í súkkulaði, skornum niður eða eins og ykkur dettur í hug.

 

Geymið kökurnar inn í ísskáp þangað til þær eru bornar fram.




www.facebook.com/freistingarthelmu



 


 


 

 

 

 

 

 

 

 

 

 

 

 

Viltu fylgjast með þessum bloggara?

Skráðu þig til að fá nýjustu færslurnar sendar!