Thelma Þorbergsdóttir
Marengs súkkulaðidraumur
18. júní 2013

Marengs súkkulaðidraumur

 

Halló, góðan daginn ?? hvar er sumarið??? Ég er ekki að trúa þessu! Reyndar var ég svo heppin að ég lenti í þvílíkri sól um helgina í Borgarfirði á meðan það var þoka og rigning í borginni. Ég er meira segja brennd því ég bjóst bara engan vegin við því að það kæmi sól. Ég fór í bústað í Svartagili ásamt skemmtilegum konum, en við vorum nokkrar vinkonur og frænkur sem voru að gæsa Rakel systur. Þvílík sæla, það var örugglega alveg 18 stiga hiti þarna og dásemd að mér leið eins og ég væri komin til annars lands, sérstaklega þegar ég keyrði heim á sunnudeginum aftur inn í þokuna og rigninguna. Hver samdi við veðurguðinn fyrir þetta sumar??

Já svo er allt að gerast! Ég er að vinna að uppskriftabók sem vonandi kemur í verslanir í haust og ætla ég að nota vikuna til þess að baka úr mér allt vit! (vonandi ekki allt vit því ég ætla líka að gifta mig þarna inn á milli, eða 31. ágúst). Bókin verður stútfull af sætum freistingum fyrir öll tilefni, stór og smá og með sérstökum freistingum fyrir litla fólkið. Ég er svo heppin að hafa frábæra aðstoðarmanneskju með mér í bakstrinum hana Pálínu systur mína, en við stöndum í allskonar tilraunarstarfsemi í eldhúsinu þessa dagana og það er bara gaman hjá okkur!

Hérna er svo uppskriftin sem ég ætla að deila með ykkur í dag, sannkallaður marengs súkkulaðidraumur!

 

Þessa köku gerði ég fyrir Eurovision partí fjölskyldunnar. Ég gat hreinlega ekki ákveðið hvort ég ætti að gera djúsí súkkulaðiköku eða marengs köku svo ég bakaði bara bæði og skellti þeim saman ásamt ýmsu gúmmelaði á milli. Kakan vakti mikla lukku og fannst þeim hún ennþá betri daginn eftir! Þetta er algjör draumur sem slær allt út þegar þið fáið þörf fyrir eitthvað sætt, djúsí og ógleymanlega gott!

Súkkulaðibotn
225 sykur
110 hveiti
24 g dökkt kakó
1 tsk. matarsódi
½ tsk. lyftiduft
½ tsk. salt
1 egg
180 ml. súrmjólk
60 ml. olía
1 tsk. vanilludropar
2 msk. kaffi

Aðferð
Blandið saman sykri, hveiti, kakói, matarsóda, lyftidufti og salti í skál. Blandið eggjunum saman við og hrærið léttilega, setjið svo strax súrmjólkina og olíuna saman við og hrærið léttilega. Setjið því næst kaffið og vanilludropana saman við og hrærið á meðalhraða þar til allt hefur blandast vel saman. Passið ykkur að hræra ekki of lengi því þá getur kakan orðið seig. Deigið er mjög þunnt í sér. Hellið deiginu í smurt meðalstórt hringlaga bökunarform og bakið við 180 gráður í rúmar 30 mínútur eða þar til tannstöngull kemur hreinn upp úr miðju kökunnar. Kælið kökuna.

Súkkulaðikrem
3 eggjarauður
(geymið eggjahvíturnar í marengsinn)
100 g flórsykur
30 g smjör
150 g dökkt súkkulaði
1 tsk. vanilludropar

Aðferð
Þeytið eggjarauðurnar og flórsykurinn saman þar til blandan er orðin ljós og létt. Bræðið súkkulaðið ásamt smjörinu í potti yfir meðal hita og blandið svo saman við blönduna, bætið vanilludropum saman við. Hrærið þar til allt hefur blandast vel saman.

Gott er að láta súkkulaðikremið standa í smá stund áður en það er sett á kökuna. Smyrjið kreminu yfir kökuna og á hliðar hennar.

 

Fyrir þá sem vilja bara súkkulaðiköku þá geti þið annað hvort bara haft súkkulaðikremið á kökunni, raðað jarðarberjum á kökuna eða sett bæði jarðarber og Oreo kex. En þeir sem vilja eitthvað aðeins meira bæta við rjómanum og marengsbotninum.

Þegar súkkulaðið er komið ofan á kökuna þá setti ég á milli;

1 litla öskju af jarðarberjum skorin niður

8 stk. Oreo kex

½ lítra rjóma

Setjið jarðarberin niður í sneiðar og raðið fallega á kökuna, geymið restina svo til þess að setja ofan á kökuna. Skerið Oreo kexið gróft niður og dreifið yfir jarðarberin. Þeytið rjómann og smyrjið honum yfir allt. Setjið marengs- botninn ofan á og skreytið að vild, ég setti afganginn af jarðarberjunum og bræddi örlítið súkkulaði í potti ca. 40 g. af dökku súkkulaði.

Marengs
3 stk. eggjahvítur
170 g sykur
½ tsk. lyftiduft
40 g rice crispies

Aðferð
Til þess að marengs heppnist þá þarf að passa það að skálin sé mjög hrein annars gæti hann fallið.

Hrærið eggjahvíturnar og sykurinn saman þangað til blandan er orðin stíf. Bætið lyftiduftinu saman við og hrærið vel. Bætið rice crispies saman við og hrærið varlega saman með sleif.

Setjið smjörpappír á bökunarplötu, takið formið sem þið bökuðuð súkkulaðikökuna í og dragið hring á smjörpappírinn. Dreifið úr marengsinum á hringinn og reynið að fara ekki útfyrir línurnar.

Bakið við 150 gráðu hita í rúmar 40 til 50 mín. eða þar til marengsinn er þurr viðkomu. Kælið.

 

Já hún var fljót að fara!

Verði ykkur að góðu!

Kveðja

Thelma

www.freistingarthelmu.blogspot.com

Viltu fylgjast með þessum bloggara?

Skráðu þig til að fá nýjustu færslurnar sendar!