Thelma Þorbergsdóttir
Heimatilbúinn ís um jólin
15. desember 2017

Heimatilbúinn ís um jólin

Flestir í kringum mig gera heimatilbúinn ís fyrir jól og áramót og eiga sér sína uppáhalds eftirrétti sem aðeins eru gerðir yfir hátíðirnar. Hérna ætla ég að deila með ykkur tveimur ístertum sem innihalda einnig íslenskt skyr, það gerist varla betra. Hrikalega góðar og einfaldar ístertur sem um er að gera að búa til með góðum fyrirvara til að minnka stress og álag síðustu dagana fyrir jól. Njótið.

 

Crème Brûlée skyrís með karamellu og hnetum

Um það bil 2 lítrar

 

Innihald

5 egg

5 msk. sykur

5 dl rjómi frá Gott í matinn

340 g Ísey skyr, Crème Brûlée 

2 tsk. vanilludropar

170 g púðursykur

Karamella

200 g karamella (ég notaði Freyju karamellur)

1 dl rjómi

Toppur

50 g hakkaðar heslihnetur

100 g dökkt súkkulaði

Karamellusósa

 

Aðferð

Þeytið eggjarauður og sykur saman þar til blandan verður ljós og létt. Blandið púðursykri varlega saman við með sleif. Þeytið rjóma þar til hann stendur og blandið skyrinu saman við rjómann. Blandið rjómaskyrblöndunni saman við og hrærið varlega með sleif ásamt vanilludropum. Stífþeytið eggjahvíturnar og hrærið saman við. Það er ekki nauðsynlegt að setja eggjahvíturnar saman við ísinn. Það er um að gera að nýta þær í t.d marengstoppa eða annað. Það verður hins vegar meira úr ísnum að blanda þeim saman við.  

Setjið ísinn í hringlaga smelluform eða það form sem þið viljið nota. Setjið rjóma og karamellur í pott og bræðið yfir meðalháum hita. Gott er að hræra vel hérna svo að karamellurnar brenni ekki við. Hellið karamellunni yfir ísinn og blandið henni saman við með því að snúa hníf í hringi í gegnum ísinn þar til karamellan hefur náð að blandast saman við.

Toppur

Saxið súkkulaðið smátt niður og setjið ofan á ísinn ásamt hökkuðum heslihnetum. Þrýstið þeim varlega niður til að festa þær við ísinn. Frystið í að lágmarki 5 klukkustundir. Gott er að bera ísinn fram með karamellusírópi/sósu og rjóma.

 

Lakkrísís með piparfylltu lakkrískurli

Um það bil 2 lítrar

 

Innihald

5 egg

5 msk. sykur

5 dl rjómi frá Gott í matinn

400 g Kea lakkrísskyr

2 tsk. vanilludropar

100 g dökkt súkkulaði

150 g piparfyllt lakkrískurl með súkkulaðihjúp

 

Lakkríssósa

1 poki Bingókúlur

50 g dökkt súkkulaði

1 dl rjómi frá Gott í matinn

2 msk. síróp

½ tsk. sjávarsalt

 

Aðferð

Þeytið eggjarauður og sykur saman þar til blandan verður ljós og létt. Þeytið rjóma þar til hann stendur og blandið skyrinu saman við rjómann. Blandið rjómaskyrblöndunni sama við og hrærið varlega með sleif ásamt vanilludropum. Stífþeytið eggjahvíturnar og hrærið saman við. Það er ekki nauðsynlegt að setja eggjahvíturnar saman við ísinn og um að gera að nýta þær í t.d marengstoppa eða annað.

Grófsaxið niður súkkulaði og blandið saman við ásamt piparfyllta lakkrískurlinu. Setjið ísinn í hringlaga smelluform eða það form sem þið viljið nota. Því næst undirbúið þið lakkríssósuna sem fer á ísinn. Setjið allt saman í pott yfir meðalháum hita og hrærið þar til allt hefur náð að bráðna og blandast vel saman. Hellið lakkríssósunni yfir ísinn og blandið henni saman við með því að snúa hníf í hringi í gegnum ísinn þar til sósan hefur náð að blandast saman við. Frystið í að lágmarki 5 klukkustundir.

 

Verði ykkur að góðu og gleðileg jól!

Kveðja,

Thelma

Viltu fylgjast með þessum bloggara?

Skráðu þig til að fá nýjustu færslurnar sendar!