Thelma Þorbergsdóttir
Heimatilbúinn ís um jólin
21. desember 2015

Heimatilbúinn ís um jólin

Á mínu heimili eru ekki jól nema það sé gerður heimatilbúinn ís. Hér áður fyrr vorum við oftast með toblerone-ísköku sem er alltaf klassísk og góð. Síðustu ár hef ég þó reynt að búa til nýjan ís hver jól þó svo við eigum okkur alltaf einhvern uppáhalds ís. Ég geri ísinn oftast í formi köku og skreyti því það er svo gaman að bera fram fallega skreytta ísköku á aðfangadag eða á gamlárskvöld. Í ár prófaði ég að gera sítrónuís með karamellu og piparkökubotni. Hún er öðruvísi, en fersk og góð með nóg af karamellu. Piparkökubotninn er nauðsynlegur fyrir þennan ís því piparkökurnar gera svo einstaklega gott bragð á móti sítrónubragðinu. Í fyrra vorum við svo stórfjölskyldan í Flórída yfir jólin. Þar gerði ég tilraun að pistasíuís með súkkulaði og karamellu sem heppnaðist líka svona vel að hann endaði í Nóa Siríusbæklingnum í ár. Sá ís er hrikalega góður og hef ég gert hann aftur og aftur. Ég ætla því líka að deila honum með ykkur. Minni ykkur svo að það er hægt að sjá fleiri uppskriftir að ís inn á blogginu mínu, www.freistingarthelmu.blospot.com.

 

Thelma var að senda okkur tvær uppskriftir að heimatilbúnum ís og setti saman þetta skemmtilega myndband í leiðinni. Önnur uppskriftin er að sítrónuís með karamellu og hin að pistasíuís með súkkulaði og karamellu. Við mælum svo sannarlega með að þið prófið annan (ef ekki báða) nú um jólin og uppskriftirnar finnið þið hér: http://www.gottimatinn.is/matarblog/thelma-thorbergsdottir/heimatilbuinn-is-um-jolin/217

Posted by Gott í matinn - Matargerðarlína MS on Monday, December 21, 2015

Sítrónuís með karamellu

Innihald

Botn

230 g piparkökur

130 g smjör

 

Ís

6 eggjarauður

6 msk sykur

170 g púðursykur

½ tsk sítrónudropar

Börkur ef einni sítrónu

6 dl rjómi

200 g Pipp með karamellyfyllingu

½ dl karamellu síróp

 

Aðferð

Setjið bökunarpappír í botninn á hringlaga smelluformi um 23 cm að stærð. Setjið piparkökur í matvinnsluvél og hakkið þar til þær eru fínmalaðar. Bræðið smjör og blandið vel saman við. Setjið piparkökurnar í formið og þrýstið vel niður og upp á hliðar formsins. Gott er að nota glas til þess að þrýsta vel niður í botninn á forminu.

Þeytið eggjarauður og sykur saman þar til blandan verður ljós og létt (ef þið viljið geti þið þeytt eggjahvíturnar og blandað þeim saman í lokin eða nýtt þær í marengs). Blandið púðursykri varlega saman við með sleif. Setjið sítrónudropa og rifinn sítrónubörk saman við og hrærið vel. Þeytið rjóma og blandið honum saman við með sleif. Hrærið þar til allt hefur blandast vel saman. Skerið pipp með karamellufyllingu gróflega niður og blandið saman við ísblönduna. Hellið ísblöndunni í formið ofan á piparkökubotninn. Hellið karamellusírópinu óreglulega yfir ísinn og hrærið með hníf með því að snúa honum í hringi þar til karamellan hefur blandast ágætlega vel saman við ísinn. Frystið í lágmark 5 klst. Skreytið ískökuna með rjóma, piparkökum og karamellusírópi að vild.

Þegar þið takið ísinn út er gott að láta hann standa í nokkra stund við stofuhita. Gott er strjúka hliðar formsins með volgri tusku áður en þið losið ískökuna úr forminu. Ísinn geymist vel í 3 mánuði í frysti.

-----

(mynd - Heimir Óskarsson)

Pistasíuís með súkkulaði og karamellu

Innihald

Ís

6 eggjarauður

70 g sykkur

120 g púðursykur

7 dl rjómi

2 tsk vanilludropar

200 g konsum súkkulaði

200 g pistasíuhnetur

½ tsk sjávarsalt

200 g Pipp með karamellufyllingu

3 msk rjómi

 

Toppur

Brætt Pipp með karamellyfyllingu

Pistasíuhnetur

 

Aðferð

Þeytið eggjarauður og sykur saman þar til blandan verður ljós og létt. Blandið púðursykri varlega saman við með sleif. Þeytið rjómann og blandið honum saman við með sleif og hrærið þar til allt hefur blandast vel saman. Bætið vanilludropum saman við og hrærið. Grófsaxið súkkulaði og blandið saman við ásamt pistasíuhnetum og salti. Hellið ísblöndunni í kökuförm eða form sem þolir frost. Bræðið Pipp með karamellufyllingu í potti yfir lágum hita ásamt 3 msk af rjóma. Hrærið þar til Pippið hefur náð að bráðna alveg. Hellið brædda Pippinu yfir ísinn og hrærið léttilega í gegnum ísinn með hníf. Frystið ísinn í lágmark 5 klukkustundir. Ísinn geymist vel í 3 mánuði í frysti.

Berið fram með bræddu Pippi með karamellufyllingu og pistasíuhnetum.

 

Verði ykkur að góðu og gleðileg jól!

Kveðja

Thelma

 

Viltu fylgjast með þessum bloggara?

Skráðu þig til að fá nýjustu færslurnar sendar!