Thelma Þorbergsdóttir
Grísk jógúrt á þrjá vegu
05. febrúar 2019

Grísk jógúrt á þrjá vegu

Hér deili ég með ykkur nokkrum hugmyndum að réttum í glasi sem innihalda gríska jógúrt. Þessa rétti má fá sér í morgunmat, sem millimál eða sem eftirrétt. Það er ýmislegt hægt að gera úr grískri jógúrt, t.d. nota hana sem morgunmat og þá blanda saman við hana því sem manni þykir gott, en einnig hentar jógúrtin vel í eftirrétti þar sem hún líkist búðingi þegar búið er að blanda hana saman við alls konar góðgæti. Ef þið ætlið að nota grísku jógúrtina sem eftirrétt þá er einstaklega gott að bæta við hana dökku súkkulaði, súkkulaðisírópi, karamellu eða öðru sem ykkur langar að hafa með en það gerir réttinn ögn gómsætari og því tilvalinn sem eftirrétt. Svo er um að gera að prófa sig áfram. Allir réttirnir eru fyrir einn, en auðvelt er að margfalda uppskriftina fyrir fleiri. Njótið.

Grísk jógúrt með hnetusmjöri, berjum og hnetum

Fyrir 1

Innihald

100 g grísk jógúrt frá Gott í matinn

2 msk. hnetusmjör, kúfaðar

1 msk. döðlusíróp

½ tsk. kanill

10 stk. valhnetur

½ banani

Bláber

Jarðarber

Aðferð

Blandið grískri jógúrt, hnetusmjöri, döðlusírópi og kanil saman í skál og hrærið þar til allt hefur blandast vel saman. Skerið banana í sneiðar, setjið banana í botninn á glasi og setjið helminginn af grísku jógúrtinni ofan á, setjið því næst restina af banananum ásamt grófsöxuðum hnetum. Setjið restina af jógúrtinni ofan á ásamt jarðarberjum, bláberjum og restinni af hnetunum.

Grísk jógurt með kakó og berjum

Fyrir 1

Innihald

100 g grísk jógúrt frá Gott í matinn

1 msk. (30 g) hnetusmjör

1,5 msk. kakó

2-3 stk. jarðarber

½ banani

Aðferð

Setjið grísku jógúrtina í skál ásamt hentusmjöri og hrærið vel. Bætið kakói saman við og hrærið þar til allt hefur blandast vel saman. Skerið niður jarðarber og setjið í botninn á glasi, setjið gríska jógúrt ofan á, banana og svo restina af jógúrtinni ásamt bönunum og jarðarberjum. Best er að njóta sem fyrst svo bananinn verði ekki brúnn.

Grísk jógúrt með eplum og kanil

Fyrir 1

Innihald

100 g grísk jógúrt frá Gott í matinn

2 ½  tsk. kanill

1 tsk. vanilludropar

30 g tröllahafrar

2 msk. síróp

½ epli

8 stk. valhnetur

Aðferð

Setjið gríska jógúrt í skál ásamt 2 tsk. af kanil og vanilludropum og hrærið þar til allt hefur blandast vel saman. Setjið tröllahafra í skál ásamt ½ tsk. af kanil, sírópi og sex grófsöxuðum valhnetum og blandið vel saman. Setjið helminginn af tröllahöfrum í glas, ásamt grófsöxuðu epli, setjið gríska jógúrt ofan á, setjið því næst restina af tröllahöfrunum og epli. Setjið restina af grísku jógúrtinni ofan á og restina af eplinu og hnetunum. Að sjálfsögðu er ykkur frjálst að setja þetta ofan í glas eða skál að vild, en oft er gott að setja stökkt og svo mjúkt til skiptis. Ef þið ætlið að búa til þennan rétt daginn áður en hann er borinn fram eða nokkrum klukkustundum áður er gott að kreista örlitlum sítrónusafa yfir eplið eftir að þið skerið það niður svo það verði ekki brúnt.

Viltu fylgjast með þessum bloggara?

Skráðu þig til að fá nýjustu færslurnar sendar!