Thelma Þorbergsdóttir
Graskersbollakökur og latte með hvítu súkkulaði
19. október 2018

Graskersbollakökur og latte með hvítu súkkulaði

Graskersbollakökur með rjómaostakremi og latte með hvítu súkkulaði, rjóma og kanil

Ég ætla að deila með ykkur alveg ótrúlega mjúkum og góðum bollakökum sem innihalda grasker. Ég notaði graskerspæfyllingu í kökurnar sem gerir einstkalega gott kryddbragð með dúnmjúku rjómaostakremi með kanil. Þið verðið bara að prófa! Ekta uppskrift fyrir haustmorgunkaffið. Til að toppa þetta mæli ég með latte með hvítu súkkulaði, rjóma og kanil.  Einnig tilvalið að skreyta kökurnar með hrekkjavökuskrauti í tilefni hrekkjavökunnar.

Graskersbollakökur

Um 16-18 stk.

Innihald

200 g hveiti

1 ½ tsk. kanill

½ tsk. engifer

½ tsk. múskat

1 tsk. lyftiduft

½ tsk. matarsódi

¼ tsk. salt

150 g smjör

150 sykur

100 g púðursykur

2 egg

180 g graskerspæ fylling (er í niðursuðudós)

80 ml mjólk

2 tsk. vanilludropar

Aðferð

Setjið hveiti, kanil, engifer, múskat, lyftiduft, matarsóda og salt saman í skál og hrærið vel. Setjið smjör í örbylgjuofn og hitið þar til það er aðeins farið að bráðna. Setjið sykur og púðursykur í skál ásamt smjöri og hrærið saman þar til blandan verður ljós og létt. Bætið eggjum saman við, einu í senn og hrærið ásamt vanilludropum og graskerspæfyllingu/mauki. Blandið þurrefnum saman við ásamt mjólkinni til skiptist þar til allt hefur blandast vel saman. Gott er að skafa hliðarnar á skálinni og hræra öllu saman í lokin.

Setjið bollakökuform í bollakökubökunarform. Fyllið formin um ¾, eða örlítið meira en hálffull. Bakið í rúmega 15 mínútur við 180 gráðu hita eða þar til tannstöngull kemur hreinn upp úr miðju kökunnar. Kælið kökurnar alveg áður en þið setjið kremið á.

Rjómaostakrem með kanil

Innihald

150 g smjör við stofuhita

170 g rjómaostur frá Gott í matinn við stofuhita

1 ½ tsk. kanill

1 tsk. vanilludropar

350 g flórsykur

Aðferð

Hrærið smjör þar til það verður ljóst og létt. Bætið rjómaostinum saman við og hrærið þangað til blandan verður mjúk og slétt. Bætið kanil saman við ásamt vanilludropum. Bæti því næst flórsykri saman við, smátt og smátt í einu þar til allt hefur blandast vel saman. Gott er að skafa hliðarnar innan á skálinni og hræra vel í lokinn.

Setjið sprautustút t.d. 1M í sprautupoka og setjið kremið í, sprautið kreminu á kökurnar og skreytið með pekanhnetum eða því sem ykkur langar til. Tilvalið að setja t.d. eitthvað hrekkjavökuskraut á þær í tilefni halloween.

 

Latte með hvítu súkkulaði, rjóma og kanil

Þetta latte passar einstaklega vel við kryddaðar graskersbollakökurnar

Innihald

Fyrir 4

3 dl mjólk (nýmjólk)

200 g hvítt súkkulaði

2 dl sterkt kaffi

1 tsk. vanilludropar

Toppur

¼ lítri rjómi frá Gott í matinn, þeyttur

Kanill

Aðferð

Setjið mjólk, hvítt súkkulaði og vanilludropa saman í pott og hitið yfir meðalháum hita. Hrærið stanslaust þar til súkkulaðið hefur náð að báðna alveg. Hitið þar til það sýður næstum því í pottinum. Hellið kaffinu saman við og hrærið. Setjið kaffið í glös eða bolla og berið fram með þeyttum rjóma og kanil.  

 

Verði ykkur að góðu

Thelma

Viltu fylgjast með þessum bloggara?

Skráðu þig til að fá nýjustu færslurnar sendar!