Thelma Þorbergsdóttir
Drukknar bollakökur í Eurovision-partíið
22. maí 2015

Drukknar bollakökur í Eurovision-partíið

Jæja þetta Eurovision er nú meira svindlið sagði dóttir mín 4 ára. Hún sagði þó að María hefði sko verið í flottasta kjólnum og vonar að hún vinni þetta á laugardaginn! En þó svo við komumst ekki áfram þá getum við verið stolt af þessari flottu stelpu sem tók þátt fyrir okkar hönd og höldum bara með einhverju öðru landi í þetta skiptið.

Til að gera Eurovision-partíið ennþá skemmtilegra ákvað ég að deila með ykkur uppskriftum af drukknum bollakökum. Já þær eru drukknar því það er áfengi í þeim! Og þetta eru líka uppáhaldsdrykkirnir mínir, gin & tonic og mojito og þeir eru ennþá betri í bollakökum! Fyrir ykkur sem eruð ekki fyrir áfengi þá eru þær líka himneskar án þess. Bætið þá bara mjólk í staðinn fyrir áfengið og málið er dautt! Njótið!

Gin & Tonic bollakökur

12 stk.

 

180 g smjör við stofuhita

180 g sykur

2 egg

200 g hveiti

1 tsk lyftiduft

1 tsk vanilludropar

1 stk lime, rífið börkinn og notið í kökuna (safinn fer í kremið)

3 msk tonic vatn

2 msk gin

 

Aðferð

Hitið ofninn í 170 gráðu hita. Setjið bollakökuform í eldfast mót og setjið til hliðar. Hrærið smjör og sykur saman þar til blandan verður ljós og létt. Bætið eggjum saman við og hrærið vel, gott er að skafa skálina að innan með sleif. Blandið hveiti og lyftidufti saman og setjið saman við blönduna. Bætið berki af einni lime saman við og hrærið vel. Blandið tonic vatninu og gininu saman og setjið út í deigið, hrærið léttilega eða þar til allt hefur blandast vel saman. Deigið á að vera þykkt í sér. Sprautið deiginu í hvert form fyrir sig og passið að fylla formin ekki meira en 2/3. Bakið í rúmar 20 mínútur eða þar til tannstöngull kemur hreinn upp úr miðju kökunnar.

Þegar kökurnar eru tilbúnar þá takið þið þær úr ofninum og setjið til hliðar. Penslið smá gini ofan á hverja bollaköku fyrir sig. Fyrir ykkur sem viljið aðeins sterkara bragð geti þið gert þetta nokkrum sinnum. Kælið svo kökurnar alveg áður en þið setjið kremið ofan á.

 

Krem

250 g smjör við stofuhita

500 g flórsykur

1 tsk vanilludropar (2 tsk fyrir þá sem sleppa gininu)

Safi úr einni lime

2 msk gin

 

Aðferð

Hrærið smjörið þar til það er orðið ljóst og létt. Bætið flórsykrinum saman við, litlu í einu og hrærið vel á milli. Bætið vanilludropum og safa úr einni lime saman við og hrærið vel. Setjið því næst gin saman við og hrærið þar til kremið er orðið mjúkt og slétt. Setjið kremið í sprautupoka, ég notaði stút nr. 1M, og sprautið fallega á hverja köku fyrir sig. Skreytið með lime, regnhlífum, íslenska fánanaum eða hverju sem er. Geymið kökurnar í kæli, gott er að taka þær út 30 mínútum áður en þær eru bornar fram.

-----

Mojito bollakökur

12 stk.

 

130 ml súrmjólk

10 g fersk mynta

200 g hveiti

2 tsk lyftiduft

¼ tsk salt

120 g smjör við stofuhita

200 g sykur

2 egg

1 ½  stk lime, börkur og safi

2 msk romm

½ tsk vanilludropar

 

Toppur

2 msk romm

2 greinar af ferskri myntu

 

Aðferð

Byrjið á því að berja myntulaufin ágætlega, t.d. í morteli, setjið myntuna í pott ásamt súrmjólkinni og hitið yfir meðal háum hita. Hitið súrmjólkina þar til hún hefur hitnað vel og nánast farin að sjóða. Passið þó að mjólkin fari ekki að sjóða. Takið pottinn af hellunni og setjið til hliðar. Leyfið myntulaufunum að liggja í bleyti í súrmjólkinni í rúmar 15-20 mínútur. Hellið súrmjólkinni í gegnum sigti ofan í annað ílát, reynið að ná sem mestu í gegnum sigtið til að fá sem mestan safa úr myntunni, myntan á þó ekki að fara með. Súrmjólin verður skrítin en það er allt í góðu.

Hitið ofninn í 170 gráðu hita og raðið bollakökuformum í eldfast mót og setjið til hliðar. Hrærið smjör og sykur saman þar til blandan verður ljós og létt. Bætið eggjum saman við, einu í senn út í og hrærið stuttlega á milli. Gott er að skafa hliðarnar á skálinni og hræra öllu vel saman. Bætið berkinum og safanum úr 1 ½ lime, vanilludropum og rommi. Hrærið þar til allt hefur blandast vel saman. Blandið hveiti, lyftidufti og salti saman og setjið saman við deigið ásamt súrmjólkinni og hrærið léttilega eða þar til allt hefur blandast vel saman. Sprautið deiginu í bollakökuformin og passið ykkur að fylla þau ekki meira en 2/3. Bakið í rúmar 20 mínútur eða þar til tannstöngull kemur hreinn upp úr miðju kökunnar.

Á meðan kökurnar bakast, setjið rommið og fersku myntuna saman í pott og hitið yfir meðal háum hita þar til rommið er orðið vel heitt. Passið ykkur að láta rommið alls ekki sjóða. Setjið pottinn til hliðar þar til bollakökurnar eru tilbúnar.

Takið bollakökurnar út og látið þær kólna lítillega. Penslið bollakökurnar að ofan með rommblöndunni og látið kökurnar svo kólna alveg áður en sprautið kreminu á þær.

 

Krem

250 g smjör við stofuhita

500 g flórsykur

2 msk safi úr lime

3 msk romm (2 tsk vanilludropar fyrir þá sem sleppa áfenginu)

 

Hrærið smjörið þar til það er orðið ljóst og létt. Bætið flórsykrinum saman við, litlu í einu og hrærið vel á milli. Bætið safa úr lime saman við ásamt romminu og hrærið vel þar til kremið er orðið mjúkt og slétt. Setjið kremið í sprautupoka, ég notaði stút nr. 1M, og sprautið fallega á hverja köku fyrir sig. Skreytið með lime, ferskri myntu, lituðum sykri eða hverju sem ykkur dettur í hug. Geymið kökurnar í kæli, gott er að taka þær út 30 mínútum áður en þær eru bornar fram.

Góða helgi!

Thelma

www.freistingarthelmu.blogspot.com

Viltu fylgjast með þessum bloggara?

Skráðu þig til að fá nýjustu færslurnar sendar!