Thelma Þorbergsdóttir
Candy Cane ostamús og jólaískaka
10. desember 2015

Candy Cane ostamús og jólaískaka

Ostamús og ískaka

Hver elskaði ekki Candy cane brjóstsykurinn þegar maður var lítill? Svo fallega rauður og minnir svo á jólin. Hérna eru tveir unaðslegir eftirréttir sem koma skemmtilega á óvart í jólaboðinu um jólin. Þeir innihalda báðir rjómaostinn góða sem er einstaklega góður í allskyns eftirrétti og kökur.


 

Candy Cane ostamús

Fyrir 4-5

Innihald

12 stk Oreo kexkökur

3 msk smjör, bráðið

100 g hvítt súkkulaði

300 ml rjómi

8 msk flórsykur

280 g rjómaostur

1 tsk myntudropar

 

Aðferð

Setjið Oreo kexkökur í matvinnsluvél og hakkið þar til þær verða fínmalaðar. Bræðið smjör og hrærið saman við Oreo kexkökurnar. Setjið 1-2 msk af Oreo í hvert glas fyrir sig og þjappið örlítið kexblöndunni niður í botninn.

Bræðið hvítt súkkulaði yfir vantsbaði eða yfir lágum hita þar til súkkulaðið hefur náð að bráðna alveg. Setjið súkkulaðið svo til hliðar á meðan þið undirbúið rest og látið súkkulaðið ná stofuhita. Þeytið rjóma þar til hann er nánast stífur og blandið flórsykri saman við og hrærið með sleif. Hrærið rjómaost þar til hann verður mjúkur og sléttur. Blandið hvíta súkkulaðinu saman við rjómaostinn og hrærið vel saman ásamt myntudropunum. Blandið rjómanum varlega saman við og hrærið með sleif þar til allt hefur blandast vel saman.

Ef þið viljið hafa ostamúsina tvílita þá þurfi þið sprautupoka. Dýfið tannstöngli ofan í gel matarlit og setjið rönd upp eftir pokanum af matarlit. Setjið ostamúsina ofan í pokann og sprautið henni í glösin. Skreytið með Candy Cane brjóstsykri og rauðum sprinkles eða Jimmy´s. Kælið ostamúsina í 2 klst. Geymið í kæli þar til ostamúsin er borin fram. Gott er að gera ostamúsina daginn áður. 

-----

Brownie ísskaka með myntu

 

Brownie

Innihald

300 g sykur

5 egg

270 g smjör

270 g konsum suðusúkkulaði

90 g hveiti

 

ATH

Þið getið annað hvort farið eftir þessari uppskrift eða nota djöflakökumix út úr búð til að flýta fyrir. Mæli samt eindregið með þessari uppskrift sem gerir ískökuna ómótstæðilega. Mikilvægt er að báðir botnarnir séu bakaðir í jafnstórum kökuformum.

 

Aðferð

Hitið ofninn í 170 gráður og setjið smjörpappír í botninn á tveimur 20-22 cm hringlaga smelluformum. (formin sem þið notið fyrir þessa uppskrift þurfið þið að nota þegar þið setjið ísinn og kökurnar saman í form). Þeytið egg og sykur saman í skál þar til blandan verður ljós og létt. Bræðið smjör og súkkulaði saman í potti yfir lágum hita og hrærið þar til súkkulaðið hefur náð að bráðna alveg. Setjið hveitið varlega saman við brædda súkkulaðið og hrærið vel saman. Hellið því næst súkkulaðiblöndunni saman við eggjablönduna og hrærið saman með sleif þar til allt hefur náð að blandast vel saman. Skiptið deiginu milli formanna og bakið í 30 mínútur. Það er allt í lagi þó svo kakan sé alls ekki fullbökuð fyrir þessa uppskrift. Kælið kökurnar alveg áður en þið setjið þær saman með ísnum.

 

Myntuís

Innihald

225 g rjómaostur, við stofuhita

100 g sykur

30 ml mjólk

2 tsk myntudropar

½ lítri rjómi

100 g flórsykur

200 g Pipp með myntufyllingu

1-2 dropar af rauðum matarlit, gel.

 

Toppur

½ lítri rjómi

1 dl súkkulaðisíróp

Rautt spinkles eða Jimmy´s

 

Aðferð

Hrærið rjómaost og sykur saman þar til blandan verður slétt og fín. Bætið mjólk og myntudropum saman við og hrærið. Þeytið rjóma þar til hann stendur og blandið flórsykri saman við rjómann með sleif. Bætið rjómablöndunni saman við rjómaostinn og hrærið varlega saman með sleif. Skerið Pipp með myntufyllingu niður í grófa bita og blandið varlega saman við. Ef þið viljið lita ísinn þá getið þið sett 1-2 dropa af gelmatarlit að eigin vali. Í þessa uppskrift er notaður rauður matarlitur. 

Nú kemur að því að setja kökurnar og ísinn saman í smelluform.

Mikilvægt er að brownie kökurnar hafi náð að kólna alveg. Setjið smjörpappír meðfram hliðunum á smelluforminu sem þið ætlið að frysta ísinn í (sama form og brownie kökurnar voru bakaðar í). Gott er að hafa smjörpappírinn aðeins hærri en formið sjálft því kakan gæti náð örlítið fyrir ofan brúnir formsins.

Setjið einn botn af brownie köku í botninn á forminu. Setjið helminginn af ísblöndunni yfir kökuna og sléttið úr með sleif. Setjið næsta botn af brownie kökunni ofan á ísblönduna. Því næst setjið þið 1 dl af súkkulaðisírópi yfir kökuna og dreifið jafnt og þétt úr. Setjið restina af ísblöndunni ofan á og dreifið jafnt með sleif. Setjið kökuna í frysti í 5 klst að lágmarki. Takið kökuna út og takið hana úr forminu og setjið á disk. Skreytið með súkkulaðisírópi, rjóma og sprinkles/Jimmy´s. Geymið kökuna í frysti þar til hún er borin fram. Gott er að láta kökuna standa aðeins við stofuhita áður en hún er skorin. Kakan geymist vel í frysti í 30 daga. 

Njótið!

Kveðja, Thelma
freistingarthelmu.blogspot.com

Viltu fylgjast með þessum bloggara?

Skráðu þig til að fá nýjustu færslurnar sendar!