Thelma Þorbergsdóttir
Bollur með rjómaostafyllingu
23. febrúar 2017

Bollur með rjómaostafyllingu

Vatnsdeigsbollur

Ca. 15 bollur

Innihald

2 dl vatn 
100 g smjör
2 dl hveiti
1/4 tsk salt
3 egg

Aðferð

Sjóðið vatn og smjör saman í potti þar til smjörið hefur bráðnað. Blandið hveitinu og saltinu saman við og hrærið rösklega þar til deigið sleppir pottinum og myndar kúlu úr deiginu. Takið pottinn af eldavélinni, setjið deigið í aðra skál og látið kólna örlítið. Þegar deigið hefur náð stofuhita er eggjunum bætt saman við, einu í senn og hrært varlega á milli með hrærivél. Setjið smjörpappír á ofnplötu. Setjið deigið í sprautupoka og sprautið því á plötuna með jöfnu millibili.  Bakið við 200 gráðu hita í 20 mínútur, passa þarf að opna ofninn alls ekki fyrstu 15 mínúturnar af bakstirnum. Látið bollurnar kólna alveg áður en sett er á þær. Hitinn á bakaraofnum er mjög mismunandi, ef ykkur finnst bollurnar vera að brúnast heldur fljótt er gott að lækka hitann í 170 gráður eftir 5 mínútur.  

New York ostakökubollur

Uppskrift af vatnsdeigsbollum, sjá að ofan.

Innihald fylling

250 ml rjómi

230 g rjómaostur

60 g sykur

¼ tsk. salt (sjávarsalt)

1 tsk. vanilludropar

Jarðarberjasulta

Flórsykur

Aðferð

Þeytið rjómann þar til hann verður stífur og stendur, passið þó að þeyta hann ekki of mikið. Þeytið rjómaostinn, sykur, salt og vanilludropa saman í annarri skál þar til blandan verður ljós og létt. Blandið rjómanum varlega saman við með sleif þar til allt hefur blandast vel saman. Skerið bollurnar, setjið jarðarberjasultu í botninn, setjið rjómaostakrem á milli og lokið bollunni. Skreytið bolluna með flórsykri. Fallegt er að sprauta rjómaostakreminu á bolluna t.d. með sprautustút 1M. Geymið í kæli þar til bollurnar eru bornar fram. 

Bollur með kanil rjómaostakremi, Nutella og kókos

Uppskrift af vatnsdeigsbollum, sjá að ofan.

Innihald fylling

250 ml rjómi

230 g rjómaostur

60 g sykur

¼ tsk. salt (sjávarsalt)

½ tsk. vanilludropar

2 tsk. kanill

Nutella

kókos

Aðferð

Þeytið rjómann þar til hann verður stífur og stendur, passið þó að þeyta hann ekki of mikið. Þeytið rjómaostinn, sykur, salt, vanilludropa og kanil saman í annarri skál þar til blandan verður ljós og létt. Blandið rjómanum varlega saman við með sleif þar til allt hefur blandast vel saman. Skerið bollurnar, setjið rjómaostinn á milli og lokið bollunni. Gott er að setja Nutella í skal og hita örlítið í örbylgjuofninum svo það verði mjúkt og auðvelt sé að setja það ofan á bollurnar. Setjið 1 msk. af Nutella ofan á hverja bollu ásamt kókós. Geymið bollurnar í kæli þar til þær eru bornar fram. 

 

Verði ykkur að góðu

Thelma

www.freistingarthelmu.blogspot.com

Viltu fylgjast með þessum bloggara?

Skráðu þig til að fá nýjustu færslurnar sendar!