Grillaðir humarhalar með bestu hvítlaukssósu allra tíma | gottimatinn.is
Ragnar Freyr Ingvarsson
Grillaðir humarhalar með bestu hvítlaukssósu allra tíma
25. ágúst 2017

Grillaðir humarhalar með bestu hvítlaukssósu allra tíma

Í þessari færslu er það eiginlega sósan sem leikur aðalhlutverkið. Og það er vegna þess að ég held bara að mér hafi tekist að gera bestu hvítlaukssósu sem ég hef bragðað. Það er ekki eins og humarinn og piparosta-hvítlauksbrauðið hafi ekki verið gott - sósan var barasta algerlega dásamlega ljúffeng!

Og það tókst með því að ofnbaka hvítlaukinn í álpappír. Þannig umbreytist hann alveg - og það heita og sterka bragð sem oft einkennir hvítlauk mildast og en í staðinn koma sætir tónarnir og ljúfu jafnvægi er náð.

Grillaðir humarhalar með bestu hvítlaukssósu allra tíma og piparosta-ostabrauði

Hráefnalisti

Fyrir fjóra

 

Fyrir sósuna

1 stk. hvítlaukur

2 msk. jómfrúarolía

salt og pipar

1 dós sýrður rjómi frá Gott í matinn

2 msk. grísk jógúrt frá Gott í matinn

2 msk. mæjónes

1 tsk. hlynsíróp

3 msk. graslaukur

salt og pipar

 

Fyrir humarinn 

Humar

hvítlauksolía

salt og pipar

 

Fyrir piparostsosta hvítlauksbrauð

1 baguette brauð

hvítlauksolía

1 stk. piparostur

rifinn ostur eftir smekk

salt og pipar

 

Byrjum á byrjuninni - Hvítlaukssósan guðdómlega. 

Byrjið á því að setja heilan hvítlauk á álpappír og hella olíunni yfir og saltið. Innsiglið og bakið í 180 gráðu heitum ofni í 50 mínútur. 

Leyfið lauknum að kólna aðeins áður en þið farið að meðhöndla hann þar sem hann er ákaflega heitur. 

Á meðan hvítlaukurinn er að kólna setjið þið heila dós af sýrðum rjóma í skál.

Hrærið sýrða rjómann saman við tvær matskeiðar af grískri jógúrt og svo sama magni af mæjónesi og hrærið vel saman.

Hakkið graslaukinn ... 

... og blandið honum saman ásamt öllum hvítlauknum - sem auðvelt er að kreista úr hýði sínu.

Klippið humarinn upp eftir bakinu og hreinsið görnina frá og leggið humarhalann ofan á skelina.

Penslið humarinn ríkulega með hvítlauksolíu, salti og pipar. Grillið í fimm til sex mínútur á blússheitu grilli eða inni í ofni.

Skerið baguette brauðið í tvennt, penslið með hvítlauksolíu, sneiðið piparostinn þunnt og leggið á brauðið. Setjið því næst rifinn ost ofan á og grillið í ofninum í nokkrar mínútur þangað til að osturinn er bráðinn.

Svo er bara að leggja þessa dásemd á disk og njóta! Grillaður humar, ljúffengt piparosta-ostabrauð og nóg af þessari dásamlegu hvítlaukssósu.

 

Viltu fylgjast með þessum bloggara?

Skráðu þig til að fá nýjustu færslurnar sendar!