Ragnar Freyr Ingvarsson
Croque madame með bechamélsósu og Óðalsostum
23. janúar 2019

Croque madame með bechamélsósu og Óðalsostum

Hugmyndin um móðursósurnar varð til í Frakklandi á átjándu öldinni. Það var Marie-Antoine Careme, heimsfrægur matreiðslumaður og kannski fyrsti stjörnukokkurinn, sem skrifaði einna fyrstur um flokkun á sósum. Hann útbjó lista eftir því hvort að þær voru heitar eða kaldar, eftir lit og hráefnisinnihaldi. Á nítjándu öldinni einfaldaði Auguste Escoffier, annar stjörnukokkur og matreiðslusnillingur, flokkunina og gerði hana aðgengilegri.

 

Það var Escoffier sem skilgreindi, hinar fimm "les grandes sauces" - sem varð undirstaða í franskri matargerð. Við þekkjum flest þessar sósur - nöfn sumra eru kunnugleg eins og hollandaise, tómatsósa og bechamél - á meðan aðrar hljóma framandi, eins og espagnole, veloute - sem eru í raun bara soðsósur - gerðar á ólíkan hátt.

 

 

Móðursósurnar í franskri matargerð: Ljúffeng bechamélsósa bragðbætt með Óðals Ísbúa

 

 

Bechamél þekkja flestir Íslendingar sem uppstúf sem passar hangikjöti alveg ljómandi vel og mörgum finnst hann líka passa vel með bjúgum. 

 

En bechamél sósu má nota í fjöldann allan af uppskriftum - hún er ómissandi í lasagna, gerir allt fyrir moussaka, Mac'n'cheese væri óhugsandi án þess. Það má nota hana í allskonar gratín, fiskibökur og rjómapasta. 

 

Nokkur ráð: Ekki elda smjörbolluna of lengi - þykkingarkraftur hennar minnkar eftir því sem hún er elduð lengur. Bragðbæta má bechamél sósuna með ýmsum hráefnum. Hefðbundið er að setja hálfan lauk með nokkrum negulnöglum, eða lárviðarlauf eða múskat. Bragðbætirinn er auðvitað smekksatriði.

 

500 ml mjólk

30 g smjör 

30 g hveiti 

75 g ostur (t.d. Óðals Ísbúi)

Bræðið smjörið við lágan hita.

Leyfið smjörinu að brúnast örlítið, þannig að það gefi ljúffengt bragð - örlítinn hnetukeim - sem er svo ljúfur af létt brúnuðu smjöri. 

Hrærið svo hveitinu vandlega saman við og eldið það í um eina mínútu við lágan hita.

Svo er að hræra mjólkinni saman við. Setjið fyrst 100-150 ml og hrærið vandlega saman við smjörbolluna. Þegar smjörbollan hefur blandast vel saman við - bætið þið restinni af mjólkinni við og hitið að suðu. Ekki hafa áhyggjur - blandan er þunn í fyrstu en þegar hún hitnar þá þykkist sósan. 

Takið svo handfylli af osti. Hvaða osti sem er - Óðals Ísbúa, Óðals Cheddar, Gullosti - allt eftir stemmingu og tilefni.

Það er mikilvægt að hræra vandlega til að bræða ostinn saman við sósuna.

Að þessu sinni kaus ég að bragðbæta sósuna með múskati. Ég á alltaf nokkrar múskathnetur í kryddbúrinu mínu. Ég reif niður um 1/4 af hnetu saman við bechamél sósuna. Það er miklu betra en að nota malað múskat - miklu betra.

Sósan varð hnausþykk og dásamlega ljúffeng! 

 

Endilega prófið að gera bechamélsósu frá grunni - hún er ein af undirstöðum matargerðar. Ég veit ekki um ykkur en mér finnst eitthvað dáleiðandi við að horfa á þessa tauma liðast niður í bechamél sósuna. 

 

Og ef þið viljið fá ykkur dásamlega dögurð (brunch) eða hádegisverð þá er þessi uppskrift gráupplögð! 

 

 

Til að gera Croque Madame - byrjið á því að smyrja brauðsneið að utan með smjöri og leggið á heita pönnu. Raðið skinku, ég notaði prosciutto crudo, og svo ostsneiðar - chili-havarti á eina og svo venjulegan sveitaost á hina. Lokið með annarri smurðri brauðsneið.

 

 

Snúið samlokunni þegar hún er orðin gullinbrún og steikið á hinni hliðinni.

 

 

Leggið samlokurnar á ofnskúffu og makið bechamél ostasósunni. Hitið grillið í ofninum og brúnið samlokurnar að ofan.

 

Á meðan steikið þið egg á pönnu.

 

 

Það tekur bara nokkrar mínútur fyrir bechamél sósuna að brúnast.

 

 

Tyllið egginu ofan á.

 

 

Og svo er bara að njóta. Betri morgunverð er vart hægt að ímynda sér!

 

Verði ykkur að góðu!

 

 

 

Viltu fylgjast með þessum bloggara?

Skráðu þig til að fá nýjustu færslurnar sendar!