Helena Gunnarsdóttir
Smjörsteikt bleikja og jarðarberjasalsa
04. maí 2015

Smjörsteikt bleikja og jarðarberjasalsa

Eitt af því besta sem ég fæ er steikt eða grilluð glæný bleikja. Sem betur fer deila aðrir heimilismeðlimir þessum bleikjuáhuga með mér svo við skellum ansi oft í einhverskonar bleikjurétti, sérstaklega þegar sól hækkar á lofti. Það er eitthvað svo sumarlegt við þennan dásamlega fisk. Ég mæli með því að steikja bleikjuna á vel heitri pönnu upp úr nægu af smjöri og krydda með góðu sjávarsalti og nýmöluðum pipar. Galdurinn er svo að elda hana ekki of lengi, taka hana af pönnunni þegar hún er ennþá dálítið hrá í miðjunni og leyfa henni að jafna sig. Þetta er eldamennska sem tekur í mesta lagi fimm mínútur. Ég ber bleikjuna fram með roðhliðina upp því þannig finnst mér roðið haldast lengur stökkt, eins og við viljum hafa það. Jarðarberjasalsað setur gjörsamlega punktinn yfir i-ið og ég lofa að það kemur skemmtilega á óvart.

Smjörsteikt bleikja með jarðarberjasalsa og fetaosti (fyrir 3-4)

Jarðarberjasalsa

3 vel þroskaðir meðalstórir tómatar

1 bakki jarðarber (íslensk eru langbest)

½ lítill rauðlaukur

Handfylli ferskt basil

1 msk ólífuolía

2 tsk rauðvínsedik

Sjávarsalt og vel af nýmöluðum svörtum pipar

3-4 msk mulinn hreinn fetaostur, t.d. fetakubbur

 

Aðferð:
Skerið tómatana og jarðarberin smátt og setjið í skál. Saxið laukinn mjög smátt og bætið saman við. Kryddið með svörtum pipar, dálitlu salti og hellið olíunni og edikinu yfir. Skerið basilið frekar smátt og setjið saman við. 

 

Bleikjan

4 bleikjuflök

4 msk smjör

Sjávarsalt og nýmalaður svartur pipar

 

Aðferð:
Beinhreinsið bleikjuna, skolið undir köldu vatni og þerrið vel. Kryddið með salti og pipar báðum megin. Setjið smjörið á pönnu og stillið á meðalháan - háan hita. Látið smjörið bráðna og þegar það byrjar að freyða leggið fiskinn þá á pönnuna með roðhliðina upp. Steikið í 1-2 mínútur. Snúið svo flakinu við og steikið þar til roðið er stökkt eða í um 3 mínútur.  Leggið á disk og berið fram með jarðarberjasalsanu og myljið fetaost yfir. 

 

Viltu fylgjast með þessum bloggara?

Skráðu þig til að fá nýjustu færslurnar sendar!