Helena Gunnarsdóttir
Mexíkóskt kjúklingalasanja og guacamole
30. janúar 2015

Mexíkóskt kjúklingalasanja og guacamole

Þá er komið að næstu uppskrift frá mér. Að þessu sinni býð ég upp á ákaflega gómsætt mexíkóskt lasagna með tættum kjúkling og dúndur gott guacamole. Þetta er svona ekta helgar/Eurovision matur!


 

Mexíkóskt kjúklingalasanja

Hráefni:
3 kjúklingabringur
2 msk taco kryddblanda
1 laukur, smátt saxaður
2-3 hvítlauksrif, smátt söxuð
1 tsk chilliduft
1 tsk oregano
1 tsk cumin
1 dós hakkaðir tómatar
3,5 dl kjúklingasoð (vatn og kraftur)
2 msk tómatpaste
4-5 vorlaukar, smátt skornir
Salt, pipar og olía
2 pokar rifinn mozzarella ostur
1 dós 10% sýrður rjómi
Ferskt kóríander og mulinn fetaostur til skreytingar

Aðferð:
Kryddið kjúklingabringurnar með taco kryddinu, hitið pönnu með smá olíu við meðalhita. Steikið bringurnar í um 7 mínútur á hvorri hlið, eða þar til eldaðar í gegn. Takið þá af pönnunni og setjið á disk. Bætið örlítilli olíu á pönnuna ef þarf og steikið laukinn og hvítlaukinn þar til mýkist aðeins. Bætið kryddunum á pönnuna og steikið þau aðeins. Hellið tómötunum, soðinu og tómatpaste á pönnuna og hleypið suðunni upp. Smakkið til með salti og pipar. Leyfið að sjóða við vægan hita í 5-10 mínútur. Maukið sósuna með töfrasprota eða í blandara (má sleppa þessu líka). 

 

Tætið kjúklingakjötið niður með tveimur göfflum og bætið út í sósuna ásamt vorlauknum. 

    

Setjið smávegis af kjötsósunni í botninn á formi eða djúpri pönnu sem þolir að fara í ofn. Leggið tortillakökur ofan á, því næst meiri kjötsósu, smá sýrðan rjóma, rifinn ost og aftur tortillakökur. Ég notaði um 6 tortillakökur sem ég skipti í þrjú lög. Endið á kjötsósu, sýrðum og osti. 

 

Bakið í ofni við 180 gráður í 25 mínútur. Stráið fersku kóríander og muldum fetaosti yfir og berið fram t.d. með guacamole og nachosflögum. 

 

 

Uppáhalds guacamole fjölskyldunnar

 

Hráefni:
5 vel þroskaðar lárperur (ég nota litlu í netinu)
1 msk nýkreistur sítrónusafi
½ tsk gott sjávarsalt
½ lítill rauðlaukur smátt saxaður
1 tómatur, skorinn smátt
Handfylli ferskt saxað kóríander

 

Aðferð:
Skerið lárperurnar í tvennt og fjarlægið steininn. Skerið í lárperurnar með hníf þannig að þið myndið frekar stóra teninga, skafið hana svo úr hýðinu með matskeið í stóra skál. Blandið öllu vel saman og smakkið til með salti og sítrónusafa. Við viljum hafa okkar guacamole frekar gróft, ef þið viljið ekki svona grófa áferð getið þið t.d. stappað það með gaffli.  

 

Viltu fylgjast með þessum bloggara?

Skráðu þig til að fá nýjustu færslurnar sendar!