Helena Gunnarsdóttir
Lúxusfiskur með eplum, mangó chutney og rjómaosti
09. október 2015

Lúxusfiskur með eplum, mangó chutney og rjómaosti

Afskaplega vinsæll og ljúffengur fiskréttur sem sómir sér vel í hvaða veislu sem er þó ég segi sjálf frá. Þessi hefur meira að segja stundum verið gerður fyrir jólaboð í minni fjölskyldu þegar allir eru komnir með leið á stórsteikum og slær alltaf í gegn.

Lúxusfiskur með eplum, mangó chutney og rjómaosti (fyrir 3-4)

 

600 g ýsa, þorskur eða annar hvítur fiskur skorinn í bita
2 dl rækjur (má sleppa)
2 gulrætur
1 púrrulaukur
1 rauð og 1 græn paprika
1 grænt epli
2 msk smjör
2 tsk gott karríduft
200 g hreinn rjómaostur
1 dós 18% sýrður rjómi
1 dl mangóchutney
Rifinn bragðmikill ostur, t.d. Óðalsostur
Paprikuduft, salt og pipar

 

Aðferð:
Skerið fiskinn í passlega bita og kryddið með salti og pipar, leggið til hliðar. Saxið grænmetið og eplið í frekar smáa bita. Hitið pönnu á meðalhita og bræðið smjörið. Steikið grænmetið í smjörinu þar til það mýkist aðeins (geymið eplabitana). Bætið karríduftinu saman við og steikið það með í 1-2 mínútur. Bætið rjómaostinum, sýrða rjómanum og mangó chutney út á pönnuna og bræðið þetta saman. (Þynnið með örlitlu vatni ef ykkur finnst þetta of þykkt, en athugið að það kemur líka vökvi úr fiskinum þegar hann eldast.) Dreifið eplunum og rækjunum yfir og hrærið saman. Smakkið til með salti og pipar. Leggið svo fiskinn ofan á sósuna og grænmetið og leyfið þessu að malla þar til fiskurinn er nánast eldaður í gegn. Stráið þá osti yfir ásamt smá paprikudufti og stingið inn í ofn undir grill í 5 mínútur eða þar til osturinn er gullinnbrúnn. Stráið yfir saxaðri steinselju og berið fram með góðu salati og brauði eða hrísgrjónum. 

Viltu fylgjast með þessum bloggara?

Skráðu þig til að fá nýjustu færslurnar sendar!