Helena Gunnarsdóttir
Ljúffeng salsabaka með kjúklingi og rjómaosti
29. september 2016

Ljúffeng salsabaka með kjúklingi og rjómaosti

Þessi baka er dásamleg. Ekta saumaklúbbaréttur eða svona þægilegheitamatur. Innihaldið minnir ef til vill dálítið á hina frægu "Eðlu" ídýfu sem er svo sannarlega ekki til að skemma fyrir..

Bökubotn:

250 gr spelt eða hveiti (gott að nota gróft og fínt til helminga)

100 g kalt smjör

1/2 – 1 dl heitt vatn

1/2 tsk salt

 

Aðferð:
Skerið smjörið í litla teninga, vinnið allt nema vatnið saman með höndunum þannig að úr verði sandkennd mylsna. Bætið vatninu smám saman út í og vinnið áfram með höndunum þar til deigið loðir vel saman án þess að vera klístrað. Leggið deigið á hveitistráð borð og fletjið út þannig að það nái að þekja botn og hliðar á forminu sem þið notið. Mér finnst ágætt að nota lausbotna smelluform í þessa böku eða bara venjulegt eldfast mót. Stingið göt á botninn með gaffli og bakið í 15 mínútur við 180 gráður. Gerið fyllinguna á meðan.

Fylling:

 

2 frekar litlar kjúklingabringur, skornar smátt

1 rauð paprika, smátt skorin

1 laukur, smátt saxaður

Tacokrydd eða annað gott mexíkóskt krydd eftir smekk

125 g rjómaostur til matargerðar frá Gott í matinn (helst við stofuhita)

180 g sýrður rjómi 18%

4 egg

3 dl salsasósa

200 g rifinn gratínostur

 

Aðferð:
Hitið ofn í 180 gráður. Steikið kjúklinginn þar til nánast eldaður í gegn, bætið þá grænmetinu á pönnuna, kryddið og steikið áfram þar til það mýkist og kjúklingurinn er eldaður í gegn. Setjið til hliðar. Pískið saman rjómaost, sýrðan rjóma, egg, salsa sósu og helminginn af rifna ostinum. Setjið kjúklinginn og grænmetið í bökubotninn. Hellið svo eggjablöndunni yfir og stráið restinni af ostinum yfir. Bakið í 30-40 mínútur eða þar til eldað í gegn. Gott að leyfa bökunni að kólna í um 15 mínútur áður en hún er skorin. 

Viltu fylgjast með þessum bloggara?

Skráðu þig til að fá nýjustu færslurnar sendar!