Helena Gunnarsdóttir
Kjúklingaborgari með Havarti pipar og kóríander majónesi
10. mars 2018

Kjúklingaborgari með Havarti pipar og kóríander majónesi

Nýi Óðals Havarti pipar osturinn smellpassar við þennan dálítið öðruvísi kjúklingaborgara. Hann er alveg einstaklega bragðgóður og einfaldur og tiltölulega fá hráefni notuð, sem skemmir ekki fyrir. Þessi er dásamlegur á grillið en einnig má steikja kjúklinginn á pönnu og klára í ofni svo osturinn bráðni.

Kjúklingaborgari með Havarti pipar og kóríander majónesi

Þessi uppskrift dugar fyrir fjóra
 

8 úrbeinuð kjúklingalæri

2 límónur

1 handfylli ferskt kóríander

3 msk. majones

2 msk. sýrður rjómi 10% frá Gott í matinn

1 græn paprika

2 rauðlaukar

1 Óðals Havarti pipar

4 hamborgarabrauð, t.d. brioche

Sjávarsalt, nýmalaður svartur pipar og ólífuolía

 

Aðferð: Byrjið á að marinera kjúklinginn. Setjið kjúklingalærin í skál og rífið börkinn af einni límónu yfir og kreistið safann einnig yfir. Takið kóríander og skerið neðri helminginn af stilkunum mjög smátt og setjið í skálina. Geymið dálítið af kóríander laufblöðum fyrir sósuna. Setjið 2 msk. af ólífuolíu yfir ásamt vel af salti og nýmöluðum pipar og leyfið þessu að standa á meðan þið undirbúið restina af réttinum.

 

Hrærið saman majónes, sýrðum rjóma, berki af límónu, safa úr hálfri límónu, smátt söxuðum kóríander. Smakkið til með salti og pipar og setjið til hliðar.

Hitið pönnu á háum hita. Skerið rauðlauk og papriku í þunnar sneiðar og steikið uppúr dálítilli olíu, kryddið með salti og pipar. Takið af hitanum þegar kominn er fallegur litur á grænmetið.

Grillið kjúklingalærin þar til elduð í gegn, setjið þá tvær vænar sneiðar af Havarti pipar á hvert læri og lokið grillinu þar til osturinn bráðnar og hitið brauðin á meðan.

Setjið kjúklinginn á brauðin, tvö læri á hvern borgara. Toppið kjúklinginn með steiktu grænmeti og kóríander majonesi.  Berið fram með ofnbökuðum kartöflubátum.

Viltu fylgjast með þessum bloggara?

Skráðu þig til að fá nýjustu færslurnar sendar!