Helena Gunnarsdóttir
Dásamlegar súkkulaðiskonsur
05. október 2018

Dásamlegar súkkulaðiskonsur

Ég hugsa að skonsur séu eitthvað það skemmtilegasta sem ég baka. Þær eru svo mikið einfaldari en allir halda að ég skil hreinlega ekki af hverju ég baka þær ekki miklu oftar. Lykillinn að góðum skonsum, að mínu mati, er að hafa deigið dálítið blautt og aðalmálið, að vinna það eins lítið og mögulegt er, alls ekki hnoða það. Þá verða skonsurnar léttar í sér og bráðna í munni. Þessar skonsur eru svo góðar að þær má t.d. bera fram með jarðarberjum og þeyttum rjóma eins og einskonar bröns eftirrétt. Þær eru líka frábærar nýbakaðar einar og sér eða volgar með smjöri.

Ég nota bollamál í þessari uppskrift, en einn bolli er 2,5 dl.

Dásamlegar súkkulaðiskonsur

 

2 ½ bolli hveiti

2 tsk. lyftiduft

½ tsk. salt (nota flögusalt)

1/3 bolli sykur

100 g íslenskt smjör, kalt

2 egg

1 tsk. vanilludropar

¾ bolli rjómi frá Gott í matinn

150 g dökkt súkkulaði gróft saxað eða 1 ½ bolli súkkulaðibitar

3 msk. perlusykur

 

 

Aðferð:
Hitið ofn í 170 gráður með blæstri, annars 190 gráður. Byrjið á að píska saman öll þurrefnin. Skerið smjörið í litla bita og vinnið það saman við hveitiblönduna með fingrunum þar til hveitið líkist rökum sandi en ennþá dálítið eftir af litlum smjörbitum. Pískið saman með gaffli, eggi, rjóma og vanillu og bætið saman við þurrefnin ásamt súkkulaðinu. Vinnið þetta mjög lítið saman með gafflinum þannig að deigið rétt loði saman. Hellið á borð og mótið hring úr deiginu sem er um 2 cm á þykkt. Ef deigið er mjög blautt stráið þá smá hveiti á borðið. Skerið í átta jafnar sneiðar og raðið á ofnplötu. Penslið með dálitlum rjóma og stráið perlusykrinum yfir. Bakið í 18-20 mínútur.

 

Viltu fylgjast með þessum bloggara?

Skráðu þig til að fá nýjustu færslurnar sendar!