Helena Gunnarsdóttir
Bruschetta bar og berjaþrenna
04. júní 2015

Bruschetta bar og berjaþrenna

Hér eru á ferðinni réttir sem er gaman að bera fram í léttu matarboði eða bara til tilbreytingar fyrir heimilisfólkið. Það er afskaplega skemmtilegt að sitja lengi yfir bruschetta barnum og smakka á ólíkum samsetningum og ekki ónýtt að bjóða upp á vel kælt hvítvín með herlegheitunum. Skothelt plan að góðu kvöldi. Uppáhaldssamsetningarnar mínar af barnum eru annars vegar að setja saman á bruschettu, þeyttan fetaost með sultuðum rauðlauk og hins vegar pestó og hvítlauks sveppi. Svo er gaman að prófa sig áfram með ólíkar samsetningar og gæða sér á því sem er í uppáhaldi. Ég hvet ykkur til að prófa! Svo er ekki úr vegi að toppa kvöldið með dásamlegri berjaþrennu með vanillurjóma.

Bruschetta bar

 

Þeyttur fetaostur

125 gr hreinn fetaostur (t.d. fetakubbur)

2 msk hreinn rjómaostur

½ dl góð ólífuolía

2 msk saxaður skallotlaukur

Sjávarsalt og nýmalaður svartur pipar eftir smekk

 

Aðferð: Þeytið allt saman í matvinnsluvél þar til silkimjúkt. Smakkið til með salti og pipar.

Sultaður rauðlaukur

2 vænir rauðlaukar

2 msk smjör

1 dl rauðvínsedik

3 msk balsamikedik

3 msk hrásykur

Sjávarsalt og nýmalaður svartur pipar eftir smekk

 

Aðferð: Sneiðið laukinn þunnt og steikið upp úr smjörinu þar til laukurinn er brúnaður og mjög mjúkur, tekur um 10-15 mínútur. Gætið þess að laukurinn brenni ekki. Hellið rauðvínsedikinu yfir laukinn og leyfið því að sjóða aðeins niður. Bætið þá balsamikedikinu og hrásykri á pönnuna. Leyfið að malla við vægan hita í um 15 mínútur eða þar til mestur vökvinn er gufaður upp. Kryddið með smá salti og pipar.  Berið fram volgt eða stofuheitt.

 

Basil og klettasalatpestó

Góð handfylli basil og önnur góð handfylli klettasalat

1 lítið hvítlauksrif

70 g furuhnetur

100 g rifinn, ferskur parmesan ostur

Safinn úr hálfri sítrónu

1,5 – 2 dl góð ólífuolía

Sjávarsalt og nýmalaður svartur pipar

 

Aðferð: Setjið allt nema ólífuolíu í matvinnsluvél eða blandara. Blandið þar til frekar gróft mauk hefur myndast. Hellið ólífuolíunni saman við og blandið stutt saman, eða hrærið olíunni saman við með skeið. Mér þykir gott að hafa pestó frekar gróft, en ef þið viljið hafa það silkimjúkt, blandið olíunni þá lengur saman við í vélinni. Smakkið til með salti og pipar. Geymist í lokaðri glerkrukku í ísskáp í 5-6 daga.

Smjörsteiktir hvítlauks sveppir með sítrónu og timían

 

1 bakki sveppir

3 msk smjör

2 hvítlauksrif

Fínt rifinn börkur af ½ sítrónu

2 msk sítrónusafi

1/2 tsk þurrkað timjan (líka hægt að nota ferskt)

Sjávarsalt og nýmalaður svartur pipar eftir smekk

 

Aðferð: Sneiðið sveppina í frekar þykkar sneiðar. Steikið þá upp úr smjörinu við frekar háan hita. Bætið fínt söxuðum hvítlauk út á pönnuna. Kryddið með timjan, salti og pipar. Rífið að lokum sítrónubörkinn yfir sveppina og kreistið smá sítrónusafa yfir. Berið fram volgt eða við stofuhita.

Annað meðlæti:

·       Snittubrauð, þunnt sneitt, penslað með ólífuolíu og grillað örstutt.

·       Mozarellaostur

·       Parmaskina

·       Sólþurrkaðir tómatar í krukku

·       Grilluð paprika í krukku

·       Svartar ólífur

·       Klettasalat

 

-----

Berjaþrenna með vanillurjóma og marengs

(Fyrir 4)

 

250 ml rjómi

1 vanillustöng

1 msk flórsykur

Kirsuber, steinhreinsuð og skorin í bita

Bláber

Jarðarber, skorin í fjóra bita

Marengsbotn (ég notaði keyptan púðursykurmarengsbotn)

 

Aðferð: Skafið vanillufræin innan úr vanillustönginni. Setjið út í rjómann ásamt flórsykrinum. Þeytið þar til rjóminn er léttþeyttur, passið að stífþeyta hann ekki. Áferðin á að vera eins og þykk súrmjólk. Brjótið marengs í botninn á fjórum glösum, setjið kirsuber þar ofan á. Því næst rjóma, svo meiri marengs, bláber, rjóma, marengs og endið á jarðarberjunum. Best að bera þetta fram innan við klst frá því að rétturinn er búinn til því það er gott að marengsinn sé ennþá svolítið stökkur. 

 

Viltu fylgjast með þessum bloggara?

Skráðu þig til að fá nýjustu færslurnar sendar!