Helena Gunnarsdóttir
Bananarúlluterta með súkkulaðihjúp
19. september 2019

Bananarúlluterta með súkkulaðihjúp

Einu sinni hélt ég að rúllutertubakstur væri óttalegt maus og vesen og ekkert á allra færi að framkvæma. Það var mikill misskilningur. Þetta er meira að segja bara frekar einfalt og fljótlegt. Ég þarf svo varla að selja ykkur samsetninguna á rjóma, banana og súkkulaði. Draumkennt ef þið spyrjið mig. Þetta hreinlega steinliggur og ég vona að þið prófið öll að gera rúllutertu við fyrsta tækifæri.

Rúlluterta:

4 stór egg

150 g sykur

50 g hveiti

4 msk. kakó

1 tsk. lyftiduft

¼ tsk. salt

Súkkulaðihjúpur:

1 dl rjómi frá Gott í matinn

150 g súkkulaði

Fylling:

4 dl rjómi frá Gott í matinn

2 msk. flórsykur

1 tsk. vanilluextrakt

2 bananar, stappaðir

Aðferð:

1. Hitið ofn í 200 gráður með blæstri. Þekjið um 30x40 cm form að innan með bökunarpappír. Þeytið mjög vel saman egg og sykur eða þar til blandan er létt og ljós, þeytið í minnst fimm mínútur á hæsta styrk.

2. Sigtið hveitið, kakóið, lyftiduftið og saltið saman við blönduna og blandið varlega saman við. Gætið þess að missa ekki loftið úr eggjablöndunni. Hellið deiginu í bökunarform, sléttið vel úr með sleikju og bakið í 8-10 mínútur eða þar til prjóni sem stungið er í miðjan botninn kemur hreinn upp.

3. Leggið bökunarpappír, aðeins stærri en kökubotninn, ofan á viskastykki á borði. Stráið 1 msk. af sykri jafnt yfir pappírinn. Hvolfið kökubotninum ofan á sykraða bökunarpappírinn um leið og þið takið hann úr ofninum og losið bökunarpappírinn sem var undir kökubotninum. Rúllið botninum upp með viskastykkinu og látið kólna í 30 mínútur eða á meðan þið gerið hjúpinn og fyllinguna. Athugið að rúlla botninum upp á styttri hliðinni.

4. Gerið súkkulaðihjúpinn. Saxið súkkulaðið smátt. Hitið rjómann að suðu (ekki láta sjóða) og takið af hitanum. Hellið súkkulaðinu út í pottinn og hrærið þar til súkkulaðið er alveg bráðnað og glansandi.  Hellið í skál og látið kólna þannig að hjúpurinn þykkni aðeins. Líka hægt að setja í ísskáp í upp undir 30 mínútur.

5. Gerið fyllinguna. Þeytið rjómann ásamt flórsykri og vanillu þar til stífþeyttur. Blandið vel stöppuðum banana saman við. Takið rúllutertubotninn varlega í sundur. Smyrjið fyllingunni jafnt yfir botninn og rúllið upp aftur. Setjið á fat eða tertudisk og dreifið súkkulaðihjúpnum jafnt yfir.

Viltu fylgjast með þessum bloggara?

Skráðu þig til að fá nýjustu færslurnar sendar!