Helena Gunnarsdóttir
Bananabrauð með súkkulaðibitum
03. maí 2019

Bananabrauð með súkkulaðibitum

Það mætti ef til vill segja að verið væri að bera í bakkafullan lækinn að koma fram með enn eina uppskriftina að bananabrauði. Internetið er svo sannarlega fullt af þeim. En þá er líka eins gott að uppskriftin sé góð og ætti þessi ekki að valda vonbrigðum. Hér er á ferðinni sannkallað spari bananabrauð næstum bananakaka, fullt af gómsætu dökku súkkulaði og svo mjúkt og gott að það er jafnvel enn betra daginn eftir að það er bakað. Þið verðið að prófa!

 

Bananabrauð með súkkulaðibitum – það allra besta!

250 g hveiti

100 g hvítur sykur

50 g púðursykur

1 tsk. matarsódi

1 tsk. lyftiduft

½ tsk. kanill

200 g saxað dökkt súkkulaði

½ tsk. salt

3 stórir bananar, stappaðir

2 egg

125 g smjör, brætt

2 tsk. vanilluextract

 

Aðferð:

  1. Hitið ofn í 170 gráður með blæstri. Smyrjið stórt brauðform eða þekjið með smjörpappír.
  2. Pískið saman í stórri skál, hveiti, sykri, púðursykri, matarsóda, lyftidufti, kanil og salti. Hrærið söxuðu súkkulaðinu saman við.
  3. Stappið bananana í annarri skál og hrærið saman við þá eggjunum, bræddu smjöri og vanillu.
  4. Hellið bananablöndunni út í þurrefnin og blandið hægt og rólega saman. Gætið þess að hræra ekki of mikið, bara þannig að blandan er nánast alveg komin saman.
  5. Hellið í formið og bakið neðarlega í ofni í um það bil 50 mínútur eða þar til bakað í gegn.

Viltu fylgjast með þessum bloggara?

Skráðu þig til að fá nýjustu færslurnar sendar!