Halla Bára og Gunnar
Smákökur með karamellu
28. desember 2017

Smákökur með karamellu

Rjómaostakaramellufylltarsmákökur!

Rosalega langt nafn á smákökum en mér fannst eitthvað svo flott að skíra þær þetta. En kökurnar standa undir nafni og öllu því sæta ljúfmeti sem hér rennur saman í góðan munnbita. Ekkert vesen, bara gaman að búa til handa fólkinu sínu.

110 g smjör

110 g púðursykur

1 tsk. góðir vanilludropar

2 msk. rjómaostur frá Gott í matinn

2 eggjarauður

150 g hveiti

¼ tsk salt

2 eggjahvítur

pekanhnetur, saxaðar

20 rjómakaramellur

3 msk rjómi frá Gott í matinn

brætt súkkulaði

 

Hitið ofn í 170 gráður. Hrærið saman smjör og sykur þar til létt og ljóst, hrærið vanilludropa og eggjarauður saman við. Þá rjómaost með. Hrærið hveiti og salt saman. Stráið yfir smjörblönduna og hnoðið deigið saman.

Setjið eggjahvítur í skál sem og saxaðar pekanhnetur. Hnoðið hæfilega stórar kúlur úr deiginu, fer allt eftir því hve nettar þið viljið að kökurnar séu. Dýfið kúlunum í eggjahvíturnar og þá í hneturnar. Leggið á bökunarplötu og þrýstið fingri ofan í kúluna svo myndist í henni lítil skál. Stingið í ofn og bakið í 10-20 mínútur, allt eftir stærðinni á kökunum.

Setjið karamellur og rjóma í skál og bræðið saman í örbylgjuofni eða í potti.

Kökurnar eiga að fá á sig gullinn blæ og ekki bakast of mikið. Takið þær úr ofninum. Það getur þurft að laga skálina í kökunum aðeins til eftir baksturinn með því að þrýsta einhverju ávölu þar ofan í og dýpka hana. Látið kökurnar kólna aðeins áður en þið hellið kjúkri karamellunni ofan í skál hverrar köku. Stráið örlitlu sjávarsalti yfir kökurnar og karamelluna. Brætt súkkulaði er notað til skreytingar á kökurnar.

Njótið með kaffi eða tei og takið eftir að þessar kökur eru mjög góðar sem sætur biti með sætu víni!

Viltu fylgjast með þessum bloggara?

Skráðu þig til að fá nýjustu færslurnar sendar!