Halla Bára og Gunnar
Salat með hægelduðum tómötum og fetaosti
04. september 2017

Salat með hægelduðum tómötum og fetaosti

Hægeldaðir tómatar og fetaostur ­ – á leið í gott salat

Það er hægt að komast svo langt með góða máltíð með svo lítilli fyrirhöfn eins og þetta salat sýnir. Hægeldaðir tómatar, hægeldaður hvítlaukur og fetaostur er hráefni sem er vinsælt á heimilinu og þegar það er lagt saman og fleira tínt til sem öllum þykir gott, eins og túnfiskur, sýrður rjómi, svartar ólífur og egg þá er komin góð máltíð. Úr verður útgáfa af hinu klassíska Nicoise-salati sem hreint er virkilega góð og má mæla með.

Athugið að hlutföll verða að fara eftir smekk þegar salat sem þetta er sett saman.

 

Hægeldaðir tómatar og feta:

Kirsuberjatómatar, eða aðrir góðir

Fetaostur, í teningum eða heill rifinn niður

Hvítlaukur, rifin tekin sundur, mega vera í hýðinu

Ferskt timjan eða önnur kryddjurt, má sleppa en gefur gott bragð

Salt og pipar

Góð ólífuolía

 

Hitið ofn í 160 gráður. Skerið tómata í tvennt, setjið í ofnfast fat. Hvítlauksrif með. Dreifið úr fetaosti yfir. Salt og pipar. Ólífuolía og timjan. Þetta fer í ofninn og látið hægeldast þar til tómatarnir eru lungamjúkir og farnir að þorna aðeins upp og hvítlaukurinn er gullinn og sérlega mjúkur.

 

Í salat:

Ferskt salat að eigin vali, mæli með romain-salati

Góður túnfiskur

Svartar ólífur

Soðin egg

Sýrður rjómi

Ristað brauð

Salat, túnfiskur, ólífur og egg er hráefni sem fer í salatið með tómatablöndunni. Athugið að bakaði hvítlaukurinn getur að sjálfsögðu farið í salatið en einnig er gott að rista brauð, smyrja það með sýrðum rjóma og kreista hvítlaukinn yfir. Borða brauðið með salatinu.

 

Dressing:

4 msk. góð ólífuolía

1 msk. edik, epla- eða hvítvínsedik til dæmis

1 msk. dijon sinnep

salt og pipar

 

Hrærið allt hráefnið saman.

Það er hægt að setja salatið saman og bera fram á stóru fati en einnig er fallegt að bera bakaða tómatana fram á fati og annað hráefni í skálum svo hver og einn setji saman salatdisk fyrir sig. Verði ykkur að góðu. 

Viltu fylgjast með þessum bloggara?

Skráðu þig til að fá nýjustu færslurnar sendar!