Halla Bára og Gunnar
Portúgalskur saltfiskur - fyrir alla fjölskylduna
13. maí 2016

Portúgalskur saltfiskur - fyrir alla fjölskylduna

Nú kemur inn fiskréttur frá okkur, gerist ekki nógu oft, kannski vegna þess að HBG finnst ekki alveg nógu gaman að elda fisk en gott að borða hann! GS er mun betri í fisknum og hefur gert ýmsa góða rétti sem mætti gefa hugmyndir að. Þessi uppskrift er ættuð frá Portúgal og hefur einhverra hluta vegna verið elduð handa okkur á páskum af móður og tengdamóður. Þar sem fjölskyldan getur sameinast í því að þykja þessi fiskréttur virkilega góður fannst mér um að gera að fá að birta uppskriftina og leyfa öðrum að prófa. Þið verðið ekki svikin af þessum rétti. Hann kemur virkilega skemmtilega á óvart!

Portúgalskur saltfiskur - fyrir alla fjölskylduna

1 kg útvatnaður saltfiskur, soðinn og þerraður

1 meðalstór laukur, smátt saxaður

4 hvítlauksrif, eftir smekk, fínt skorin eða marin

5-6 egg, hrærð

2-3 lárviðarlauf

2 dl gæða ólífuolía

sjávarasalt og svartur pipar

lófafylli fersk steinselja, smátt söxuð

svartar ólífur

 

600 g kartöflur afhýddar og skornar í mjóa strimla, djúpsteiktar í olíu, þerraðar og saltaðar með sjávarsalti

 

Hitið ólífuolíu í potti. Laukur og hvítlaukur er látinn malla í olíunni í nokkrar mínútur án þess að brúnast. Lárviðarlaufin eru sett út í olíuna og leyft að malla aðeins með.

Rífið saltfiskinn niður og hrærið hann saman við olíuna og laukinn, látið malla saman í nokkrar mínútur og piprið fiskinn eftir smekk. Takið pottinn af hitanum og hrærið eggin saman við fiskinn og gætið að því að jafna vel úr eggjablöndunni. Setjið pottinn á lágan hita.

Hrærið kartöflustrimlana varlega saman við réttinn, þá steinseljuna. Smakkið til með salti ef þarf, fer eftir saltstyrk fisksins. Skreytið með steinselju og svörtum ólífum. Gott að bera þær einnig fram með réttinum.

Fersk salat, gott brauð og gæðavín er best með þessum virkilega góða mat. Rétturinn er ekki síðri kaldur en heitur og eins daginn eftir.

 

Viltu fylgjast með þessum bloggara?

Skráðu þig til að fá nýjustu færslurnar sendar!