Halla Bára og Gunnar
Lambakótilettur á marokóska vísu
14. nóvember 2014

Lambakótilettur á marokóska vísu

Uppskrift í uppáhaldi hjá okkur. Ofsalega góð kryddblanda sem við notum helst á lambakótilettur. Það er hægt að gera ansi mikið meira úr íslensku lambakótilettunum en að elda þær upp á gamla móðinn, þótt það standi ávallt fyrir sínu. Hér eru þær í þessari marokósku kryddblöndu og bornar fram með fersku tómatsalati með fetaosti. Athugið að þessi kryddblanda er mjög góð á allt lambakjöt og kjúkling.

kótilettur; 

2 msk heil kúmínfræ

1 msk sæt paprika, duft

½ tsk chillí, duft

1 msk gott sjávarsalt

12-16 kótilettur

50 g brætt smjör

 

Hrærið allt kryddið saman í morteli og myljið aðeins saman. Rétt áður en á að elda kótiletturnar, smyrjið þær með bræddu smjöri og veltið þeim upp úr kryddinu. Kótiletturnar má bæði grilla og steikja á pönnu, ekki elda þær alveg í gegn því best er að stinga þeim í heitan ofn í 5-10 mínútur áður en þær eru bornar fram.

Hellið afganginum af brædda smjörinu yfir kótiletturnar áður en þær fara í ofninn og eins má strá kryddblöndunni yfir. Því meira krydd í smjörinu því betra, því smjörið í ofnfatinu er notað sem sósa til að dreypa yfir kjötið. Það má einnig bera kryddið fram með matnum.

 

tómatsalat;

400 g kirsuberjatómatar

½ rauðlaukur, fínt saxaður

150 g fetaostur

2 msk ferskt eða þurrkað óreganó

100 g svartar ólífur

 

dressing:

1 hvítlauksrif

1 tsk sjávarsalt

1 ½ msk rauðvínsedik

100 g kirsuberjatómatar

6 msk extra virgin ólífuolía

salt og svartur pipar

 

Maukið hvítlauk og salt vel saman. Maukið tómatana í matvinnsluvél. Hrærið þá saman hvítlaukinn, tómatmaukið og allt annað hráefni í dressinguna. Blandið öllu saman sem fer í salatið og hellið dressingunni yfir. Piprið aðeins með svörtum pipar.

Berið fram með kótilettunum en athugið að þetta salat er mjög gott með ýmsu öðru.

 

Viltu fylgjast með þessum bloggara?

Skráðu þig til að fá nýjustu færslurnar sendar!