Halla Bára og Gunnar
Kjúklingur í brauði með hvítlaukssmjöri og ýmsu öðru góðgæti
17. mars 2016

Kjúklingur í brauði með hvítlaukssmjöri og ýmsu öðru góðgæti

Hér er ein uppáhalds af góðum mat sem allir í fjölskyldunni eru hrifnir af. Við skorum á ykkur að prófa þetta sem allra fyrst. Þessi hugmynd hefur ótal útgáfur en tillagan sem fylgir er alltaf góð og einföld. Um er að ræða kjúkling í brauði. Hljómar einfalt og er einfalt. Hér snýst allt um smekk og vilja þess sem er að fara að borða en ég tiltek það sem er gott að gera:

Kjúklingur:

4 kjúklingabringur

4 msk ólífuolía

2 msk gott edik

2 msk lime- eða sítrónusafi, gott að rífa börkinn mjög fínt með

salt og pipar

1 msk sætt dijon sinnep eða korn sinnep, má sleppa

rifinn parmesanostur

 

Hráefnið hrært saman í marineringuna. Hver kjúklingabringa skorin þvert og lögð í marineringuna, velt vel upp úr henni. Látin liggja í marineringunni í a.m.k. klukkustund. Einfaldast er að skella kjúklingnum í ofn að þessu loknu, á 180 gráður í um 20-30 mínútur. Auðvitað má steikja hann líka og allt eins grilla. Tíminn snýst algjörlega um það hversu þykkar bringurnar eru. Berið þær fram heitar.

 

Meðlæti:

gæðabrauð – baguette, súrdeigsbrauð

100 g smjör

2 hvítlauksrif, söxuð

2 msk góð ólífuolía

klettasalat 

ferskt kóríander

mozzarellaostur í sneiðum

gott majones

 

Bræðið smjör á vægum hita í potti, setjið hvítlauk saman við og látið malla á vægum hita. Hrærið olíuna saman við. Skerið súrdeigsbrauð í sneiðar eða baguette þvert og grillið örlítið í heitum ofni. 

 

Samsetning:

Smyrjið brauðið með majonesi. Leggið mozzarellasneiðar ofan á, kjúkling, klettasalat og kóríander. Dreypið hvítlaukssmjöri yfir. Gott að strá smá gæðasalti og pipar yfir. Berið fram. 

 

Athugið að þetta er ótrúlega þægilegur og góður réttur sem má bera fram með svo miklu meira meðlæti. Tómatar, mozzarella og fersk basilíka klikkar til dæmis ekki. Allt grænmeti, ferskt eða grillað. Ostar af ýmsu tagi. Njótið á þann hátt sem stemmning og stuð segir til um! 

Viltu fylgjast með þessum bloggara?

Skráðu þig til að fá nýjustu færslurnar sendar!