Halla Bára og Gunnar
Kanilformkaka með rjómaostakremi
25. febrúar 2016

Kanilformkaka með rjómaostakremi

Við hjónin erum komin á eitthvað skeið þar sem formkökur heilla sérlega mikið. Það er eitthvað svo skemmtilega einfalt við þær og ekkert vesen fyrir utan það hvað þær eru góðar með kaffi og tei. Þessi uppskrift er blanda úr ýmsum áttum má segja; hún er hefðbundin hvít sandkaka, með kanilsnúðaívafi og kremi eins og gulrótarkaka. Góð blanda og virkilega þess virði að baka.

Uppskriftin er stór en það er ákveðinn kostur að baka fleiri kökur og frysta til að eiga, ekki rétt? Þetta er uppskrift í tvær formkökur.

Kanilformkaka

Kaka:

200 g mjúkt smjör

2 bollar sykur

6 egg

3 bollar hveiti

1 tsk salt

1 tsk lyftiduft

1 bolli sýrður rjómi

2 msk olía

1 msk vanilludropar

 

Hrærið saman smjör og sykur þar til létt í sér, hrærið egg saman við eitt í einu þar til úr verður mjúk blanda. Hellið þurrefnum saman við, þá sýrðum rjóma, olíu og dropum. Blandið vel en ekki hræra deigið lengi.

 

Kanilblanda:

6 msk mjúkt smjör

2/3 bolli púðursykur

1 msk hveiti

1 ½ tsk kanill

1 tsk vanilludropar

 

Hrærið allt hráefnið saman þar til áferðarfallegt og mjúkt.

 

Krem:

1 lítil dós hreinn rjómaostur

2 msk ósaltað og mjúkt smjör

1 ½ b flórsykur

¼ bolli mjólk eða matreiðslurjómi

1 tsk vanilludropar

 

Hrærið allt hráefnið saman þar til kremið veður slétt og huggulegt, um tvær mínútur.

 

 

Aðferð:

Hitið ofn í 180 gráður. Fyllið hvort formkökuform að 1/3 hluta með deiginu. Hellið varlega ¼ kanilblöndunnar yfir deigið í sitthvoru forminu. Takið gaffal og hrærið rólega í deiginu með hringlaga hreyfingum til að dreifa kanilblöndunni um deigið. Hellið rest af deigi yfir formin sem og kanilblöndunni og hrærið aftur á sama hátt.

Stingið í ofn og bakið í 50-60 mínútur. Ekki baka of mikið en þegar líður á bökunartímann þarf að stinga í kökuna til að athuga hvernig staðan er á henni. Hún gæti þurft lengri tíma í ofninum. Takið úr ofninum og kælið áður en kremið er smurt á þær. Njótið vel!

 

Viltu fylgjast með þessum bloggara?

Skráðu þig til að fá nýjustu færslurnar sendar!