Halla Bára og Gunnar
Hægelduð svínasíða
19. desember 2014

Hægelduð svínasíða

Hægeldaður matur er heillandi á marga vegu. Hann bragðast á einstakan hátt og eldamennskan er afslappandi og gefandi. Hér er hægelduð svínasíða með rjómalöguðum cannelini-baunum – matur sem skaust upp í eitt af efstu sætunum í uppáhaldsréttum fjölskyldunnar þegar hann var gerður fyrst. Frábær jólamatur og einstakur í afganga.

Það sem margir kannast við sem elda mat, er að þegar komið er að matartíma er lystin kannski ekki upp á það besta hjá kokkinum! Það gerist mun síður þegar tími er tekinn í eldamennskuna á þennan hátt. Þess vegna njóta allir matarins mun rólegri, vitandi af ást og einlægni þess sem eldaði og lagði allt í matinn. 

   

Svínasíða

1 ½ kg svínasíða
3 msk ólífuolía
1 ½ msk fennelfræ
4 greinar ferskt rósmarín
2 hvítlaukar
2 rauðlaukar
2 laukar
Salt og svartur pipar
500 ml kjúklingasoð

Hitið ofn í 220 gráður. Skerið þverar rákir í puruna á svínasíðunni. Hitið um 1 lítra af vatni að suðu. Hellið heitu vatninu yfir puruna og þerrið kjötið að því loknu. Þetta er gert til að opna puruna og gera hana mögulega stökkari við eldun. Saxið rósmarínið smátt. Skerið hvítlaukinn í tvennt, þvert, án þess að afhýða hann. Afhýðið laukinn og skerið hann í tvennt, einnig þvert.

Smyrjið kjötið og puruna með ólífuolíu, nuddið fennelfræum og rósmaríni vel í kjötið og inn í rákirnar á purunni. Gerið þetta sömuleiðis með saltið og piparinn.

Leggið laukinn í botninn á djúpri ofnskúffu eða stóru fati sem þolir heitt. Setjið laukinn í tvær skipulegar raðir. Leggið kjötið ofan á laukinn þannig að það hvíli ekki í skúffunni. Þetta hindrar það að kjötið brenni við botninn og gerir soðið ennþá bragðbetra. Leggið hálfu hvítlaukana í kring. Stingið í 220 gráðu heitan ofninn í 20 mínútur.

Að þeim tíma liðnum hellið þið helmingnum af kjúklingasoðinu í ofnskúffuna og setjið hana aftur í ofninn í 20 mínútur. Þá er hitinn á ofninum lækkaður í 130 gráður, afgangurinn af soðinu settur í ofnskúffuna og allt látið malla í ofni í 3 klukkustundir. Fylgist vel með matnum í ofninum, takið skúffuna út og ausið soði yfir á 20-30 mínútna fresti.

Takið kjötið úr ofninum og látið það standa í 15 mínútur. Hellið soðinu í pott og ef þarf, skafið kryddskán úr botninum á ofnskúffunni í pottinn. Komið upp suðu og látið sjóða niður í nokkrar mínútur. Geymið soðið þar til maturinn er borinn fram.

Skerið kjötið í sneiðar eða rífið það niður í smærri bita. Berið það fram með baununum. 

 

Rjómalagaðar baunir

1 msk ólífuolía
50 g smjör
3 skalottulaukar, smátt saxaðir
4 msk hvítvínsedik
150 ml kjúklingasoð
2 msk rósmarín, smátt saxað
2 dl rjómi
3 hvítlauksrif
2 msk steinselja, smátt söxuð
3x400 g dósir af cannelini-baunum
Salt og svartur pipar

Látið renna vel af cannelini-baununum í sigti. Hellið ólífuolíunni á pönnu og bræðið smjörið með. Mýkið laukinn í 3 mínútur. Setjið hvítlaukinn saman við og mýkið áfram í tvær mínútur en gætið vel að því að hann brúnist ekki. Skvettið hvítvínsedikinu á pönnuna. Þá fer rósmarínið saman við og hrærið allt vel saman. Hellið rjómanum út í ásamt kjúklingasoðinu. Komið upp suðu og látið blönduna sjóða niður í nokkrar mínútur eða þar til hún hefur minnkað um 1/3. Hrærið baunirnar varlega saman við og hitið þær vel í gegn. Hrærið steinselju saman við og smakkið til með salti og pipar.

 

 

Berið fram

Setjið baunir á disk fyrir hvern og einn, gott að nota djúpa diska. Kjötið fer ofan á baunirnar og vel af soðsósunni yfir allt saman. Njótið vel og lengi. 

 

Afgangar

Það sem er einstakt við þennan rétt er að hann er ekki síðri daginn eftir. Ef eru afgangar af kjöti og soði er um að gera að nota þá í pastaréttinn sem hér fylgir.

Sjóðið tagliatelle skv. leiðbeiningum eða annað pasta. Rífið kjötið niður í pott og hellið soði út í þannig að rétt fljóti yfir. Komið upp suðu og lækkið hitann. Sjóðið örlítið niður þar til blandan tekur að þykkna. Hrærið þá saman við 3-5 msk af rifnum parmesanosti, allt eftir smekk. Smakkið til með salti og svörtum pipar. Setjið pastað saman við sósuna og blandið vel. Berið fram og stráið parmesanosti yfir. 


 

Viltu fylgjast með þessum bloggara?

Skráðu þig til að fá nýjustu færslurnar sendar!