Halla Bára og Gunnar
Hægeldaður kjúklingur Marbella
05. mars 2015

Hægeldaður kjúklingur Marbella

Tökum upp þráðinn þar sem frá var horfið og skellum okkur aftur í að hægelda. Nú er það kjúklingur…já, kjúklingur! Það geta einhverjir orðið hissa á að hægelda kjúkling en þessi verður einstaklega góður og dregur í sig mikið bragð af sætu, seltu og kryddi, ólífum, kapers og sveskjum. Við fengum fyrst kjúkling Marbella í Barcelona og eftir töluvert gúgl og vangaveltur var þetta uppskriftin sem við vildum prófa. Við urðum ekki svikin af henni og notum hana aftur og aftur.

Hægeldaður kjúklingur Marbella

Fyrir 4

 

½ bolli þurrt hvítvín

2 msk púðursykur

1 ½ tsk þurrkað óreganó

3 msk rauðvínsedik

sjávarsalt og svartur pipar

6 hvítlauksrif, marin

3 msk kapers

1 bolli sveskjur

½ bolli grænar ólífur

4 bringubitar af kjúklingi og 4 leggir

¼ b steinselja, söxuð

 

Hitið ofn í 120 gráður. Hrærið saman hvítvín, púðursykur, óreganó, edik, salt og pipar, hvítlauk, kapers, sveskjur og ólífur. Komið kjúklingnum fyrir í góðum ofnpotti og hellið vökvanum yfir. Blandið vel og látið löginn leika vel um kjúklinginn. Lokið pottinum, stingið í ofn og látið malla í fimm til sex tíma. Veltið kjúklingnum aðeins í pottinum einu sinni á þessum tíma.

Takið pottinn úr ofninum að þessum tíma liðnum. Stráið steinseljunni yfir réttinn í pottinum. Athugið að kjötið dettur af beinunum og er umlukið ótrúlega bragðgóðum safanum. Berið fram með kartöflustöppu eða hrísgrjónum og öllu góðgætinu sem er í pottinum.

 

Viltu fylgjast með þessum bloggara?

Skráðu þig til að fá nýjustu færslurnar sendar!