Halla Bára og Gunnar
Coca Cola rjómaostakaka
20. júlí 2018

Coca Cola rjómaostakaka

Kakan með langa nafnið

Coca Cola – rjómaosta – marmarasúkkulaðikaka með pekanhnetum og hvítu súkkulaði!

Ótrúlega mjúk og bragðmikil kaka, góður eftirréttur og Cokeið kemur skemmtilega inn með rjómaostinum. Aldrei prófað að nota Coke í köku en það virkar ansi hreint ótrúlega og maður finnur alveg fyrir því. Rjómaosturinn er bræddur með smjöri og er fullkominn til að kalla fram marmaraáhrifin. Verulega þess virði að prófa og njóta til fullnustu.

Þurrefni:

2 bollar hveiti (250 g)

1 tsk. natron

¼ bolli kakó (30 g)

1 ¼ bolli sykur (150 g)

 

Hrærið þurrefnin vel saman með gaffli í kekkjalausa þurrefnablöndu.

 

Blaut efni:

2 egg

½ bolli repju- eða sólblómaolía (1 dl)

1 tsk. vanilludropar

1 bolli Coca Cola (2 ½ dl)

 

Hitið ofn í 200 gráður. Hrærið saman, þeytið, þar til vökvinn hættir að skilja sig og freyðir aðeins. Hellið saman við þurrefnin og blandið vel en varlega. Ekki hræra lengi en náið úr öllum kekkjum.

 

Í botninn:

Kókosflögur eða kókosmjöl

Pekanhnetur, saxaðar

Hvítt súkkulaði, dropar eða saxað

 

Hér er það smekksatriði hversu mikið skal nota af hráefnunum. Notið fallegt form eða ofnfast mót. Smyrjið það að innan með smjöri. Stráið kókos í botninn, ásamt pekanhnetum og súkkulaði. Hellið deiginu yfir.

 

Rjómaostakrem:

110 g smjör, brætt

220 g rjómaostur frá Gott í matinn

250-350 g flórsykur, sætumagn eftir smekk

 

Bræðið saman smjör og rjómaost. Setjið sykurinn saman við og blandið vel. Hrærið allt saman í kekkjalausa blöndu. Hellið í mjórri bunu yfir súkkulaðideigið í forminu, frá hægri til vinstri, yfir allan flötinn. Takið gaffal, stingið honum létt í deigið og hreyfið hann til og frá, með léttum hreyfingum. Allt til að rjómaostakremið myndi fallegt marmaramynstur í súkkulaðibotninn.

Stingið í heitan ofninn og bakið í um 25-35 mínútur. Alls ekki baka kökuna of lengi, hún á að vera frekar blaut. Fylgist vel með henni og stingið í hana. Berið fram volga eða kalda og með þeyttum rjóma.

Viltu fylgjast með þessum bloggara?

Skráðu þig til að fá nýjustu færslurnar sendar!