Halla Bára og Gunnar
Aspas-pasta basta og mozzarellabrauð með!
18. apríl 2016

Aspas-pasta basta og mozzarellabrauð með!

Einn súper einfaldur pastaréttur og það með hráefni sem er í uppskeru um þessar mundir á heitari slóðum. Aspas – fátt sem kemst nærri aspas í góðum mat. Svo ofureinfalt að elda og eiga við og ef ferskur og flottur þá besti matur í… Í uppskriftinni sem fylgir er ferskur aspas skorinn í þunnar sneiðar og þá er hann tilbúinn nánast á núll einni. Réttur fyrir alla aldurshópa, sælkera sem og þá sem eru ekki alltaf vissir og svo er brauðið líka sér kapítuli. Verði ykkur að góðu!

 

400 g pasta, soðið skv. leiðbeiningum al dente

3 dl pastasoð

 

2 msk ólífuolía

1 msk mjúkt smjör

6-8 stórar sneiðar af hráskinku, skornar í frekar smáa bita

1 búnt ferskur aspas, skorinn í þunnar sneiðar

fersk basilíka, lúkufylli, sneidd þunnt

2-3 dl rjómi

1 dl rifinn parmesanostur

salt og pipar

 

Olía og smjör brætt á pönnu. Hráskinka á heita pönnuna og látin malla þangað til hún er orðin pínu stökk á brúnunum. Aspas saman við og allt látið blandast vel saman. Rjóma hellt yfir og örlítil suða látin koma upp til að allt malli á pönnunni.

Gerið þetta á meðan að pastað sýður. Basilíkan fer út í sósuna og allt hrært saman. Núna pastavatnið. Þá parmesanosturinn. Smakkið til með salti og pipar og gott getur verið að strá örlitlu af krafti í duftformi í sósuna. Látið malla þar til sósan þykknar aðeins.

Hellið af pastanu þegar tilbúið (ekki gleyma að halda pastavatni fyrir sósuna!). Hrærið sósuna saman við pastað og berið fram með meiri parmesanosti.

 

 

Heitt mozzarellabrauð

 

Mjúkar bagettur

Mjúkt smjör

Mozarellakúla, þunnt sneidd

Salt

Hvítlaukur ef vilji er til

 

Skerið raufar í brauðið, en ekki alveg niður, skal haldast saman. Setjið smjörklípu ofan í hverja rauf, sem og mozzarellasneið. Ef þið viljið hafa hvítlauk fer hann líka með. Leggið brauðið á ofnplötu eða í form. Rífið smá meiri ost yfir brauðið og stráið örlitlu salti með. Stingið í heitan ofn þar til osturinn er bráðinn og brauðið gullið. Berið fram með pastanu.

 

Viltu fylgjast með þessum bloggara?

Skráðu þig til að fá nýjustu færslurnar sendar!