Hafdís Priscilla Magnúsdóttir
Sykurlaus karamellu ostakaka Dísu
01. september 2016

Sykurlaus karamellu ostakaka Dísu

Bakstursgleðin hefur verið að hrjá mig undanfarnar vikur og fátt komist að en að standa í eldhúsinu og baka. Núna eiga ostakökur hug minn allan og hugmyndir af ýmsum uppskriftum að ostakökum komnar á blað og þessa uppskrift krotaði ég niður á blað í kaffinu í vinnunni um daginn.

Karamellu ostakaka Dísu

Botn

60 g smjör

170 g pekanhnetur

1 msk sukrin gold (púðursykur ef þið eruð ekki að forðast sykur)

3 msk kókosmjöl

1 tsk kanil

 

Setjið hneturnar í matvinnsluvél og vinnið þær í mjöl. Einnig er hægt að hafa botninn grófari og setja hneturnar í poka og berja aðeins með kökukefli.  Var sjálf með grófhakkaðar hnetur í botninum.

Setjið smjör í pott og bræðið.

Bætið við hráefninu ofan í og blandið vel saman. Notið 20 cm springform eða silikonform og setjið botninn í. Ég notaði silikonform og setti botninn í frystinn í korter og tók hann svo úr forminu, setti álpappír ofan í formið og upp með hliðunum og botninn svo ofan á. Þetta gerði ég svo auðveldara yrði að fjarlæga kökuna þegar hún væri tilbúin.

 

Karamella

250 ml rjómi

5 msk Fibersirup Gold (sykurlaust síróp sem fæst í flestum verslunum) 

Setjið í hæfilega stóran pott og fáið suðuna upp. Lækkið undir hitanum og látið malla þar til karamellan fer að þykkjast. Tekur um 15-20 mínútur

 

Fylling

250 g rjómaostur frá MS Gott í matinn

80 g sukrin melis (flórsykur ef þið eruð ekki að forðast sykur)

1 tsk vanilla extract eða vanilludropar

3 dl þeyttur rjómi

100 g af karamellu (karamellan þarf að vera búin að kólna áður en sett út í)

 

Þeytið rjómann og setjið til hliðar.

Rjómaostur, sukrin melis, karamella og vanilla extract þeytt vel saman og í lokin er rjóminn varlega blandaður við.

Setjið yfir botninn.

Setjið restina af karamellunni yfir kökuna ásamt pekanhnetum og síðan inn í ísskáp.

Takið kökuna varlega úr forminu og setjið á kökudisk.

Njótið.

 

Viltu fylgjast með þessum bloggara?

Skráðu þig til að fá nýjustu færslurnar sendar!