Gígja S. Guðjóns
Tyrkisk peber jólaís með piparfylltum reimum og toblerone
16. desember 2016

Tyrkisk peber jólaís með piparfylltum reimum og toblerone

Tyrkisk peber og fylltar pipar reimar, er það ekki í tísku? Af hverju ekki að skella þá bara í jólaís. Ég gerði tvo til að geta smakkað einn og haft hinn á jólunum og jiminn eini hvað hann er góður! Viss um að hann slái í gegn á hverju heimili... það er að segja ef þið þorið að víkja út af vananum og prófa eitthvað nýtt.

Uppskrift fyrir 8-10

 

Innihald:

500 ml rjómi

4 egg

1 msk. vanilludropar

8 msk. flórsykur

200 g toblerone (100 g í ísinn og 100 g til skreytingar)

150 g mulinn tyrkisk peber brjóstsykur (nánast duft, ég setti hann í 2 poka og muldi með hamri, einnig ætti að matvinnsluvél að virka)

100 g pipar fylltar lakkrísreimar (getið notað restina í pokanum til skrauts)

 

Aðferð:

Rjóminn er þeyttur og settur til hliðar.

Egg, flórsykri og vanilludropum er hrært saman í hrærivélinni þar til blandan verður létt og ljós, þá er rjómanum og sætindunum hrært varlega saman með sleif og blandan sett í form og inn í frysti. Best er að gera ísinn að minnsta kosti kvöldi áður en hann er borinn fram. Eina sem ég var hrædd um var að lakkrísinn yrði harður en þvert á móti, hann var dúnamjúkur.

Njótið vel og gleðileg jól :)

 

Facebook síðan mín er www.facebook.com/gigjas

 

Viltu fylgjast með þessum bloggara?

Skráðu þig til að fá nýjustu færslurnar sendar!