Pizzasnúðar með sterku pepperóní og Mexíkóosti | gottimatinn.is
Gígja S. Guðjóns
Pizzasnúðar með sterku pepperóní og Mexíkóosti
06. apríl 2018

Pizzasnúðar með sterku pepperóní og Mexíkóosti

Ég skellti í þessa dásamlega góðu pizzasnúða í dag í rokinu og rigningunni.

Fyrir mánuði síðan kom lítill gutti í heiminn og ég viðurkenni það var smá challenge að vera ein heima og baka. Það ætti ekki að taka nema klukkustund að útbúa snúðana með því að láta deigið lyfta sér en þetta voru alveg góðir 2 tímar hjá mér með drykkjar og kúkableyjupásum en það er bara stemmari!

Það er einstaklega gott að taka með sér nýbakaða snúða eða skinkuhorn í bústað eða upp í fjöll. Ég deildi með ykkur uppskrift af skinkuhornum í fyrra fyrir páskana og ég hvet ykkur eindregið til að prófa þau líka.

Skinkuhorn með léttsmurosti, skinku og rifnum osti 

 

Uppskrift að pizzasnúðunum er svohljóðandi:

 

Ofninn hitaður á 180 gráður

Uppskrift gerir um 30-40 snúða

Tími: klukkustund

 

Deig:

600 ml volgt vatn

20 g þurrger

3 tsk. sykur

3 msk. olía

1 egg

2 tsk. salt

1 kg hveiti / svo meira til að hnoða í endann

 

Fylling:

Sterkt pepperóní

Skinka

Mexíkóostur

Rifinn Pizzaostur frá Gott í matinn

Pizzasósa

Óreganó krydd

Aðferð:

Gerið er sett í volgt vatnið og látið bíða í nokkrar mínútur.

Þá er sykri, olíu, eggi og salti blandað saman við og hrært og í lokinn hveitið og hnoðað með höndunum.

Deigið er síðan látið lyfta sér í um hálftíma.

Þegar deigið hefur lyft sér er það flatt út. Það er fínt að setja meira hveiti á deigið áður en það er flatt út svo það festist ekki við undirlagið.

Síðan er áleggið sett á, rúllað upp og skorið í litla bita - Mexíkóosturinn er rifinn niður með rifjárni.

Ég valdi að setja snúðana í tvö eldföst form en auðvitað er hægt að raða þeim á plötu líka.

Bakið í 15 mínútur eða þangað til snúðarnir hafa tekið góðan lit.

Fleiri uppskriftir frá mér er hægt að finna á like síðunni minni á facebook www.facebook.com/gigjas og á heimasíðunni www.gigjas.com

Viltu fylgjast með þessum bloggara?

Skráðu þig til að fá nýjustu færslurnar sendar!