Gígja S. Guðjóns
Lakkrís- og súkkulaðibitakökur
03. desember 2018

Lakkrís- og súkkulaðibitakökur

Ég gerði þessar æðislegu lakkrís og súkkulaðibitakökur í dag og þær eru unaður í hverjum bita. Ég er hrædd um að ég þurfi að láta fela boxið fyrir mér svo ég klári þær ekki allar ein. Kökurnar eru ekta mjúkar amerískar súkkulaðikökur með smá lakkrís tvisti. Eina sem ég var hrædd um var að lakkrísinn yrði harður í kökunum en hann varð það alls ekki.

Uppskriftin er einföld, tekur aðeins 30 mínútur og gerir hún um 60-65 kökur.

Innihald:

220 g smjör

1 bolli sykur

1 bolli púðursykur

2 egg

2 tsk. vanilludropar

1 tsk. matarsódi

2 tsk. lyftiduft

1/2 tsk. salt

3 bollar hveiti

150 g lakkrískurl með súkkulaði

100 g súkkulaði í kökurnar

50 g súkkulaði til skrauts (val)

 

Aðferð:

Smjörið er sett í hrærivélina og hrært þar til það verður létt og ljóst, þá er púðursykrinum og sykrinum bætt við og hrært saman.

Næst fara egg og vanilludropar út í og hrært vel.

Þurrefnunum er blandað saman í sér skál og þeim svo bætt við í hrærivélina.

Súkkulaði og lakkrískurli hrært saman við í lokinn.

Litlar kúlur eru mótaða á bökunarpappír, eða um ein teskeið af deigi og þær eru bakaðar í ofninum við 180 gráður og blæstri í 8-10 mínútur.

Mér fannst skemmtilegt að poppa aðeins upp á kökurnar og skreyta þær með súkkulaði. Þá er súkkulaði brætt yfir vatnsbaði og þær skreyttar eins og ykkur sýnist.

Njótið vel kæru lesendur og gleðilega hátið.

Fleiri uppskriftir frá mér er að finna á www.facabook.com/gigjas og www.gigjas.com

Viltu fylgjast með þessum bloggara?

Skráðu þig til að fá nýjustu færslurnar sendar!